გირჩი — მეტი თავისუფლების ლიდერის, ზურაბ ჯაფარიძის განცხადებით, ნაციონალური მოძრაობის თავმჯდომარის, ნიკა მელიას დაკავებით ხელისუფლებამ ყველაფერი, რისთვისაც ბოლო 30 წელში, დამოუკიდებლობის შემდეგ ვიწვალეთ, "უნიტაზში გაუშვა". ამის შესახებ მან On.ge-ს განუცხადა და მელიას დაკავებას გამოეხმაურა.

ჯაფარიძის თქმით, ახლა ყველა ქვეყანას, რომელიც წლების განმავლობაში რუსეთის ფაქტორის გამო საქართველოს NATO-ში არშეშვების საბაბს ეძებდა, ეს არგუმენტები გაუმყარდება.

"მოხდება ის, რომ ქვეყნის გარეთ თუ ვინმე ლობისტი გვაყვდა, ვინც საქართველოს ლობირებდნენ ნატოში და ევროკავშირში გაწევრიანების თვალსაზრისით, რომ საქართველო არის დემოკრატიის კუნძული ამ რეგიონში და ასე შემდეგ, ეს ამბავი მოკვდება. ხალხს არგუმენტები აღარ ექნებათ საქართველოს ლობირებისთვის", — თქვა მან.

მისივე განცხადებით, საჭიროა ხელისუფლებაზე ზეწოლა, როგორც ქვეყნის შიგნით, ასევე ქვეყნის გარეთ, რადგან ევროინტეგრაციის გზისკენ დასაბრუნებლად მოქმედი ხელისუფლების სწრაფად წასვლაა გამოსავალი.

დღეს სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ. რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმებელი შენონაში შევიდნენ როგორც სახურავიდან, ისე პირველ სართულზე არსებული შესასვლელებიდან. მათ პირველი საართული გაათავისუფლეს და მოგვიანებით ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იყო გამაგრებული. მათ ოთახში გამოიყენეს გაზიც.

აღსანიშნავია, რომ მელიას დაპატიმრება სწორედ ყოფილი პრემიემინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.