შინაგან საქმეთა მინისტრობის კანდიდატის, ვახტანგ გომელაურის განცხადებით, მოპედებზე მართვის უფლების მისაღები გამოცდის ჩაბარება და მართვის მოწმობის გაცემა იგეგმება.

"მოქალაქეები სატრანსპორტო საშუალებებს ონლაინ, სპეციალური პროგრამის საშუალებით დაარეგისტრირებენ. იგეგმება მოპედების რეგისტრაცია, მოპედებზე მართვის უფლების მისაღები გამოცდის ჩაბარება და მართვის მოწმობის გაცემა", — განაცხადა გომელაურმა საკომიტეტო მოსმენის ფარგლებში სიტყვით გამოსვლისას.

დღეს საკანონმდებლო ორგანოში მინისტრობის კანდიდატების მოსმენა დასრულდა. ხვალ, 22 თებერვალს პარლამენტი ახალ პრემირმინისტრსა და მთავრობის კაბინეტს დაამტკიცებს.

მინისტრთა კაბინეტის ახალი შემადგენლობისა და მთავრობის მეთაურის დამტკიცება მას შემდეგ გახდა აუცილებელი, რაც 18 თებერვალს გიორგი გახარიამ პრემიერმინისტრის თანამდებობა დატოვა.