ვანისა და ბაღდათის მიტროპოლიტმა, ანტონმა ჟურნალისტების კითხვებს არ უპასუხა და მიზეზად დისკრიმინაციული არგუმენტი გამოიყენა. მისი აზრით, მაღალიერარქებს კითხვას მხოლოდ მორწმუნე და მაზიარებელი უსვამს. მიტროპოლიტმა ჟურნალისტებს ჰკითხა, მათგან რომელი იყო ასეთი, რითიც დისკრიმინაციულ მდგომარეობაში ჩააყენა სხვა აღმსარებლობის მქონე ჟურნალისტები.

"თქვენ ვინ ბრძანდებით? მერე ჟურნალისტობა რას ნიშნავს? რაღაც ის არის, რომ დადგებით აუცილებლად უნდა გაგცეთ პასუხი? რას ნიშნავს ჟურნალისტობა, რაღაც ისეთი ბრონია, რომ აუცილებლად უნდა გაგცეთ პასუხი?

მომისმინეთ, იერარქებს მორწმუნეები უსვამენ [კითხვებს]. თქვენ რომელი ხართ მორწმუნე, მაზიარებელი?", — განაცხადა მან.

ჟურნალისტების რეპლიკაზე, რომ საზოგადოებაში არსებობს კითხვები, რომელზე პასუხებიც სურთ, მიტროპოლიტი პასუხობს:

"საზოგადოების ინტერესებს დემოკრატიულმა წყობამ გასცეს პასუხი, იერარქიული წყობა სხვა რამეს გულისხმობს".

როდესაც ერთ-ერთმა ჟურნალისტმა სცადა კითხვის დასმა მეუფე გრიგოლ კაციას განცახდებაზე იმის შესახებ, რომ ეკლესიაში იყო დაპირისპირება და მან ვერ შეძლო ნაჩხუბარი მხარეების შერიგება, მიტროპოლიტმა თქვა: "ხოხ, ხოხ, ხოხ".

შემთხვევის ამსახველი ვიდეო მთავარმა არხმა გაავრცელა.