სულ მალე საკულტო ვიდეოთამაშის კიდევ ერთ და უახლეს კინოეკრანიზაციას ვიხილავთ.

კინოსტუდია Warner Bros.-მა რამდენიმე საათის წინ წელს დაგეგმილი თავისი ყველაზე მაღალი მოლოდინების მქონე პრემიერებიდან ერთ-ერთი ყველაზე დამაინტრიგებლის — Mortal Kombat-ის პირველი ტრეილერი გამოაქვეყნა.

გავრცელებული კადრებიდან დარწმუნდებით, რომ წინ წარმოუდგენლად სასტიკი, დაძაბული და სისხლიანი სანახაობა გველოდება.

მხოლოდ ფილმის ტრეილერიც კი იმდენ ძალადობრივ სცენას შეიცავს, რომ მის სანახავად YouTube-სა თუ სხვა ინტერნეტპლატფორმებზე ასაკობრივი შეზღუდვა დააწესეს და მაყურებელს წინასწარ აფრთხილებენ, თუ რამდენად მძიმე კადრებს შეიცავს ის.

Mortal Kombat ერთ-ერთი ყველაზე ცნობილი ვიდეოთამაშია, რომლის მიხედვითაც აქამდეც გადაუღიათ ფილმები: 1995 და 1997 წლებში. თითქმის 24 წლის შემდეგ კი ეკრანებზე კიდევ ერთხელ გააცოცხლებენ დაუნდობელი მებრძოლების ისტორიას.

ფილმის პრემიერა 16 აპრილსაა დაგეგმილი.