საქართველოს პრეზიდენტი, სალომე ზურაბიშვილი აცხადებს, რომ ოპოზიციონერი ლიდერების, გიგი უგულავასა და ირაკლი ოქრუაშვილის შეწყალების მიზანი სტაბილურობის შენარჩუნება და პოლიტიკური კრიზისის დაძლევა იყო. თუმცა, მისი თქმით, პოლარიზაცია და დაძაბულობა დღითიდღე იზრდება.

"ცხრა თვის წინ მივიღე ჩემთვის უმძიმესი და საზოგადოებისთვის მტკივნეული გადაწყვეტილება, რომელიც განპირობებული იყო მხოლოდ და მხოლოდ სახელმწიფო სტაბილურობის შენარჩუნებით და ემსახურებოდა პოლიტიკური კრიზისის დაძლევასა და დეპოლარიზაციას.

სამწუხაროდ, ქვეყანაში დღითიდღე იზრდება პოლარიზაცია, დაძაბულობა და დაპირისპირება. ლეგიტიმურად ცნობილი არჩევნების შედეგების კითხვის ნიშნის ქვეშ დაყენება, დაუმორჩილებლობის ყველა ფორმის გამოყენება, საზოგადოებრივ-სოციალური პროტესტის წაქეზება მიზნად ისახავს ქვეყნის დასუსტებასა და დესტაბილიზაციას", — აცხადებს ზურაბიშვილი.

სალომე ზურაბიშვილი ამბობს, რომ დაძაბულობის განსამუხტად კონსტრუქციული დიალოგია საჭირო.

"ჩემი გამოცდილებიდან გამომდინარე, მზად ვარ ყველა ფორმის დიალოგს მხარი დავუჭირო, თუმცა დარწმუნებული ვარ, რომ დათმობის პოლიტიკა მხოლოდ მაშინ ამართლებს, თუ ორივე მხარე კონსტრუქციული დიალოგისთვის მზადაა და არა, როცა დათმობა აღქმულია სისუსტედ, ან უფრო მეტიც, როდესაც ეს შეიძლება ვინმემ საკუთარ გამარჯვებად წარმოაჩინოს. ასევე, კონსტრუქციულ დიალოგს ეწინააღმდეგება წინაპირობების წაყენება და პროცესების რადიკალიზაცია", — აცხადებს ზურაბიშვილი.

ზურაბიშვილი იმედოვნებს, რომ პრემიერმინისტრობის კანდიდატი, ირაკლი ღარიბაშვილი და მომავალი მთავრობა შეძლებს მძიმე პოლიტიკური პროცესების შეჩერებას.

"ვიმედოვნებ, პრემიერ-მინისტრობის კანდიდატი და მომავალი მთავრობა შეძლებს ამ მძიმე პროცესების შეჩერებას და არ დაუშვებს, რომ ვინმემ საკუთარი პოლიტიკური ამბიციები ქვეყნის ინტერესებზე მაღლა დააყენოს და საფრთხე შეუქმნას ქვეყნის იმ ინსტიტუტებს, რომლებიც დემოკრატიული და სამართლებრივი სახელმწიფოს საყრდენია", — ვკითხულობთ მის მიერ გავრცელებულ განცხადებაში.

დღეს, ქართული ოცნების თავმჯდომარემ, ირაკლი კობახიძემ, პრემიერმინისტრობის კანდიდატად ირაკლი ღარიბაშვილი წარადგინა. ახალი პრემიერმინისტრის დამტკიცება მას შემდეგ დადგა დღის წესრიგში, რაც გიორგი გახარიამ თანამდებობა დატოვა. მან ეს გადაწყვეტილება სწორედ პოლარიზაციისა და შესაძლო დაპირისპირების თავიდან აცილებით ახსნა.

პრეზიდენტმა გიგი უგულავა და ირაკლი ოქრუაშვილი გასული წლის 15 მაისს შეიწყალა.