ვისაც დეტექტიური ჟანრის სერიალები უყვარს, მას ეს სიახლე განსაკუთრებულად დააინტერესებს: HBO-ს ახალ სატელევიზიო შოუში ოსკაროსანი ქეით უინსლეტი გამომძიებლის როლს მოირგებს.

Mare of Easttown (ისტთაუნის მეირი) — ასე ჰქვია ახალ სერიალს, რომელიც პენსილვანიის შტატში მდებარე ერთ პატარა ქალაქში მომხდარი მკვლელობის გამოძიების შესახებ მოგვითხრობს.

როგორც ცოტა ხნის წინ გამოქვეყნებული პირველი ტრეილერიდან ვიგებთ, სიუჟეტი ადგილობრივი მოსახლეობის ბნელ მხარეებთან ერთად, მთავარი გმირის, დეტექტივი მეირ შიანის პირად ტრავმებსაც მოჰფენს ნათელს.

აღსანიშნავია, რომ ამ ახალი სერიალის რეჟისორი კრეიგ ზობელია, რომელსაც მანამდე ისეთი გახმაურებული სატელევიზიო შოუების რამდენიმე ეპიზოდი გადაუღია, როგორებიცაა The Leftovers (ნარჩენები), Westworld (ველური დასავლეთის სამყარო) და American Gods (ამერიკელი ღმერთები).

2011 წელს სერიალში Mildred Pierce (მილდრედ პირსი) თამაშის შემდეგ, რომელმაც ქეით უინსლეტს ემის ჯილდო მოუტანა, HBO-ს ახალ დეტექტიურ დრამაში მონაწილეობა მისი პირველი სატელევიზიო როლი იქნება.

მოკლედ, პრემიერისთვის, რომელიც 18 აპრილს შედგება, ლოდინი ნამდვილად ღირს.