ერთიანი ნაციონალური მოძრაობის ერთ-ერთი წარმომადგენლის, გია ბარამიძის თქმით, პოლიტიკური ლიდერები ენმ-ის ლიდერის, ნიკა მელიას დაკავებას არ დაუშვებენ, თუკი სასამართლო ამგვარ გადაწყვეტილებას მიიღებს და მას მშვიდობიან ფარად აეფარებიან.

"ვარაუდი გვაქვს, რომ ყველანაირი აბსურდი და სისულელე შეიძლება ჩაიდინონ იმისთვის, რომ რამენაირად შეასრულონ გავრილოვის პირით შემოთვლილი პუტინის ბრძანება, რომ პრევენციის მიზნით, როგორც გავრილოვმა ბრძანა, უნდა დაიჭირონ ნიკა მელია. მელია და არავინ, ვინც იქ იყო გავრილოვის გასაპროტესტებლად, სახელმწიფო გადატრიალებას რომ არ აწყობდა, ეს ყველამ იცის, ყველასთვის ცხადია. იდიოტი უნდა იყო, რომ ეს მართლა დაიჯერო, რომ ცარიელი შენობის ეზოში შესვლით სახელმწიფო გადატრიალდებოდა. მაგრამ ბუნებრივია, პუტინს სჭირდება საქართველო ისე ჰყავდეს დაჩოქებული, რომ გავრილოვის ჩამოსვლაზე ქართველებმა ხმა ვერ ამოვიღოთ. ხმას ამოვიღებთ კიდევაც, ვიბრძოლებთ კიდევაც და აი ამ ბრძოლის მთავარ სიმბოლოს, ნიკა მელიას, დავიცავთ მშვიდობიანად, არაძალადობრივად, უიარაღოდ, მაგრამ მტკიცედ და პრინციპულად. დავუდგებით წინ მშვიდობიან ფარად და შევეწინააღმდეგებით მის დაპატიმრებას", — განაცხადა ბარამიძემ.

ამ წუთებში ნიკა მელიას სასამართლო პროცესი მიმდინარეობს. ნაციონალური მოძრაობის ოფისში ნიკა მელია და მისი მხარდამჭერები, მათ შორის ოპოზიციონერი პოლიტიკოსები არიან შეკრებილი. მელია აცხადებს, რომ მას ვერ დაიჭერენ და უკანონო გადაწყვეტილებას არ დაემორჩილება, პოლიტიკოსები კი ამბობენ, რომ მელიას არ გაატანენ.

ქართულმა ოცნებამ ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.