ნაციონალური მოძრაობის თავმჯდომარის, ნიკა მელიას განცხადებით, სასამართლო მის საქმეზე ისეთ გადაწყვეტილებას გააფორმებს, რაც ქართულმა ოცნებამ პოლიტიკურად უკვე მიიღო. მისივე თქმით, ორივე შემთხვევაში ეს იქნება შიშით ნაკარნეხევი გადაწყვეტილება.

"ეს პროკურორი, რომელიც ჩემი პროკურორია, მგონი, ყველა რეზონანსულ საქმეზე ეს ქალბატონო იყო. ნებისმიერ შემთხვევაში, რა გადაწყვეტილებაც არ უნდა გაფორმდეს, მიიღონ არა, გადაწყვეტილებას იღებენ როცა მსჯელობენ, უბრალოდ გააფორმებენ იმ გადაწყვეტილებას, რომელიც ქართულმა ოცნებამ პოლიტიკურად უკვე მიიღო. ორივე შემთხვევაში ეს იქნება შიშით ნაკარნახევი. გადაწყვეტილება იქნება ორი. ერთი მურუსიძის სასმაართლოს გააფორმებინებენ პატიმრობას, რომელიც იქნება შიშით ნაკარნახევი. მეორე შემთხვევაში, არდაპატიმრებაც, ასევე, შიშით ნაკარნახევი იქნება. შიში რას გააკეთებინებს დღეს ქართულ ოცნებას, ეს დავლოდოთ და ვნახოთ", — განაცხადა ნიკა მელიამ.

მისივე თქმით, საქართველოს ვერცერთ მოქალაქეს გავრილოვი ივანიშვილთან კომბინაციაში ვერ დაიჭერს.

ნიკა მელიასთვის აღკვეთის ღონისძიების საკითხზე სასამართლო ამ წუთებში მსჯელობს.

ქართულმა ოცნებამ მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.