ინტენსიური თოვის გამო, მცხეთისა და დუშეთის მუნიციპალიტეტების ათობით სოფელი ელექტროენერგიის გარეშეა დარჩენილი. მერიის ინფორმაციით, დუშეთის მუნიციპალიტეტში ელექტროენერგია არ მიეწოდება ჭოპორტს, ახატანს, ბულაჩაურს, მლაშეს, წითელსოფელს, ჩარგალს, თვალივს, ანანურს, ჭართალს, გუდამაყარს, დიდველს, ფასანაურს ხეობას, ჟინვალს, არაგვისპირს, ბოდორნას, გრემისხევს. ძლიერმა ნალექმა პრობლემები შექმნა კობში და გუდაურშიც, ფასანაურის მიმდებარე ტერიტორიაზე დაზიანდა 110-მეტრიანი გადამცემი ხაზი.

რაც შეეხება მცხეთის მუნიციპალიტეტს, ამ დროისთვის საგურამო, შანკევანი, ბურიანი, გალავანი და ჯიღაურა, ნიჩბისი, აღდგომიაანთკარი, წილკანი, ერედა, ფრეზეთი, ქსოვრისი, ძალისი ელექტროენერგიის გარეშეა დარჩენილი. ამ კუთხით პრობლემა უკვე აღმოიფხვრა ყაზბეგისა და თიანეთის მუნიციპალიტეტებში.

"ამ დროისთვის შესაბამისი სამსახურების წარმომადგენლები შემთხვევის ადგილებზე არინ გასულები, მიმდინარეობს დაზიანებული ფიდერების და ქვესადგურების აღდგენითი სამუშაოები. პრობლემის ოპერატიულად მოგვარების გამო ენერგო-პრო ჯორჯიამ რეგიონში დამატებითი ტექნიკური ჯგუფები გაგზავნა", — აცხადებენ მერიაში.

თოვამ პრობლემები თითქმის მთელი ქვეყნის მასშტაბით შექმნა. საგანგებო სიტუაციების მართვის სამსახურში აცხადებენ, რომ დიდთოვლობის გამო დახმარებისთვის 140 შეტყობინება მიიღეს. გამოძახებების უმრავლესობა მოტეხილ ხესა და თოვლში ჩარჩენილ მანქანას ეხება. წყნეთის გზაზე კი ავტობუსის გაჩერება წაიქცა, რის შედეგადაც მოზარდი დაშავდა. პოლიკლინიკაში პირველადი დათვალიერების შედეგად მას არ აღენიშნებოდა დაზიანებები და ექიმის ინფორმაციით, არ საჭიროებდა დამატებით ჩარევას, ამიტომ მშობლების მოთხოვნის საფუძველზე, გაწერეს.

პრობლემები შეიქმნა გზებზეც. ჰაერის ტემპერატურის მკვეთრი ვარდნისა და ინტენსიური თოვლის გამო, ქვეყნის საერთაშორისო თუ შიდასახელმწიფოებრივ მაგისტრალებსა და გზების გარკვეულ მონაკვეთებზე გადაადგილება დილიდან შეზღუდულია.