2015 წელს კუნძულ მავრიტუსზე ჩასული მეცნიერები, რომლებიც ვულკანურ ქანებს იკვლევდნენ, ერთ უცნაურობას წააწყდნენ. კუნძულის ქანებში აღმოაჩინეს კრისტალები, რომლებიც სამი მილიარდი წლით დაათარიღეს - ეს ნივთიერებები თავად კუნძულ მავრიტუსის ასაკზე სამასჯერ ძველი აღმოჩნდა. ასეთი კრისტალები დედამიწის კონტინენტებზე მოიპოვება, მავრიტუსი კი აფრიკისა და აზიის კონტინენტებიდან დიდი მანძილითაა დაშორებული. სწორედ ამიტომ, მეცნიერებმა ივარაუდეს, რომ ამ მინერალების წყარო კუნძულთან ახლოს, წყალქვეშ უნდა იყოს. სავარაუდოდ, ამ ადგილას არსებობდა კონტინენტი, რომელიც შემდეგ ჩაიძირა, ხოლო მისი ნაწილები ვულკანურმა ლავამ ზედაპირზე ამოიტანა.

მავრიტუსის ახლოს ჩაძირული კონტინენტის არსებობის თეორია პირველად 2013 წელს წამოაყენეს. მაშინ იოჰანესბურგის Witwatersrand ვიტვატერსრანდის უნივერსიტეტის მეცნიერებმა ლუის აშვალის ხელმძღვანელობით, მავრიტუსზე 2 მილიარდი წლის წინანდელი ცირკონის კრისტალები აღმოაჩინეს. დამოუკიდებელი კონტინენტის ვერსია მაშინ სამეცნიერო წრეებში უარყვეს, რადგან კრისტალები იმდენად პატარა ზომის იყო, რომ მათი მოხვედრა კუნძულზე ნებისმიერი გზით იყო შესაძლებელი. ახლა სიტუაცია განსხვავებულია: მას შემდეგ, რაც იგივე კრისტალები კუნძულის ქანებში იპოვეს, სკეპტიკოსებს კონტრარგუმენტები აღარ დარჩათ.

აშვალის ვარაუდით, ძველისძველი კონტინენტი, რომელსაც მავრიტია უწოდეს, ინდოეთის ოკეანის ქვეშ არის და აღმოჩენას ელის.