რესპუბლიკური პარტიის ერთ-ერთი ლიდერის, ხათუნა სამნიძის განცხადებით, ის დეპუტატის უფლებამოსილების შეწყვეტის შესახებ პირვანდელი გადაწყვეტილების ერთგულია და ამ საკითხში არაფერი იცვლება.

"ჩვენი განცხადებები დევს პარლამენტში და ჩვენ ერთგულნი ვართ ამ გადაწყვეტილების, რომ ჩვენი უფლებამოსილება უნდა შეწყდეს. [...] საქართველოს პარლამენტი და ქართული ოცნება იქცევა უკანონოდ, ეს ახალი არ არის ჩვენს რეალობაში. ჩვენ გვყავს ხელისუფლება, რომელსაც არც კანონი აინტერესებს, არც საზოგადოებრივი აზრი, არც ოპოზიციის აზრი და არც პოლიტიკური კრიზისი, რომელზეც თვითონ არის პასუხისმგებელი და მუდმივად გაიძახის, რომ მას ჰყავს 150 წევრი პარლამენტში", — აცხადებს სამნიძე.

მისივე თქმით, მიუხედავად იმისა, რომ იგი არ აპირებს მანდატის გამოყენებას და საპარლამენტო საქმიანობაში გრძელვადიანად ჩართვას, მაინც შეავსო დეკლარაცია, რადგან ამას კანონი ავალდებულებს. მისივე თქმით, დეკლარაციას მთელი ოპოზიცია ავსებს.

როგორც მან On.ge-სთან საუბარში დააზუსტა, მას დეკლარაცია უკვე შევსებული აქვს და მისი ინფორმაციით, ოპოზიციური სპექტრის უმრავლესობა დეკლარაციას ავსებს.

ხათუნა სამნიძემ დღეს განაცხადა, რომ თუ ქართული ოცნება პარლამენტში უბარიერო პროპორციული არჩევნების კანონპროექტს დააინიცირებს, რესპუბლიკური პარტია მანდატს ერთჯერადად გამოიყენებს და კანონპროექტს კენჭისყრისას მხარს დაუჭერს.