თავდაპირველად ტელეკომპანია ფორმულამ გაავრცელა ინფორმაცია, რომ კულტურული მემკვიდრეობის პორტალზე ოკუპირებული ტერიტორიები რუსულ ენაზე წერია. On.ge დაუკავშირდა კულტურული მემკვიდრეობის სააგენტოს, სადაც გვითხრეს, რომ რუკები არ არის მათ მიერ მომზადებული და გამოყენება პირველ ეტაპზე, გადაუდებელი "ტექნიკური მოცემულობიდან" გამომდინარე დასჭირდათ. უწყების განმარტებით, წინააღმდეგ შემთხვევაში, მათი საინფორმაციო პორტალი საძიებო რუკების გარეშე დარჩებოდა.

"ჩვენი პორტალი თავდაპირველად ავამოქმედეთ ნორვეგიულ კოლეგა ინსტიტუციასთან თანამშრომლობით. ნოემბრის თვეში ეს საინფორმაციო პორტალი განვაახლეთ, მათ შორის, გავხადეთ თავსებადი მობილურ აპლიკაციებთან მიმართებაში. მაგრამ საქმე იმაში გახლავთ, რომ ის რუკები, რომლებიც ჩვენს საძიებო პორტალზეა მითითებული, ჩვენი გაკეთებული არ გახლავთ. ეს არის საერთაშორისო რუკები, open street-ის მიერ მომზადებული. მხოლოდ და მხოლოდ ტექნოლოგიური მიზეზის გამო, მოცემულ მოკლევადიან ეტაპზე, ჩვენი პორტალი თავსებადი აღმოჩნდა მხოლოდ ამ საძიებო რუკის სისტემასთან და არ აღმოჩნდა თავსებადი გუგლის საძიებო რუკებთან", — გვითხრეს სააგენტოში.

მათი განცხადებით, საჯარო რეესტრის ეროვნულ ბიუროსთან აქტიურად თანამშრომლობენ, რათა ეს საძიებო რუკები მოკლე დროში განახლდეს.

"აქტიური თანამშრომლობა გვაქვს საჯარო რესსტრის ეროვნულ ბიუროსთან, რომელმაც უკვე განაახლა მონაცემთა ბაზა საძიებო რუკებისა, გვრჩება მხოლოდ ერთი ეტაპი პროგრამული უზრუნველყოფისა, რომლის საფუძელზეც უკვე ახალი მონაცემებით შემდგარი საძიებო რუკები იქნება თავსებადი და ადაპტირებული ჩვენს გეოსაინფორმაციო საძიებო პორტალთან. აბსოლუტურად ვიზიარებთ პოზიციას, რომ არსებული ტერიტორიები უნდა იყოს ქართულ ენაზე მითითებული, ასე, რომ ეს დროებითი უხერხულობის მომენტი იქნება მოკლე დროში გამოსწორებული, მას შემდეგ, რაც პროგრამული უზრუნველყოფის ფარგლებში განვაახლებთ ამ რუკებს", — განმარტავენ უწყებაში.

კულტურული მემკვიდრეობის ეროვნულ სააგენტოში გვითხრეს, რომ ოკუპირებული ტერიტორიების ყველა ის ძეგლი, რომლის საინფორმაციო ბაზაც მათ ხელთაა, საძიებო სისტემაში ქართულ ენაზე აქვთ მოწოდებული. მათი განცხადებით, იზიარებენ "საერთო ეროვნულ განწყობას" და ამბობენ, რომ პროგრამული უზრუნველყოფის შემდეგ, ეს "ხარვეზი" სრულად აღმოიფხვრება.