ტოკიოს 2020 წლის ოლიმპიადის საორგანიზაციო კომიტეტის ხელმძღვანელმა, იოშირო მორიმ, კომიტეტის შეხვედრაზე განაცხადა, რომ შეხვედრები, რომელთაც ბევრი ქალი ესწრება, ყოველთვის იწელება, რადგან ქალები ზედმეტად ბევრს ლაპარაკობენ.

"ქალებს ერთმანეთთან შეჯიბრება მოსწონთ. როცა ერთი საუბრის დასაწყებად ხელს იწევს, დანარჩენებიც თვლიან, რომ უნდა ჩაერთონ. საბოლოოდ, ყველა რაღაცას ამბობს."

იაპონიის ყოფილი პრემიერ-მინისტრის, 83 წლის მორის განცხადებამ საზოგადოების უკმაყოფილება გამოიწვია. ტვიტერზე ადამიანები ჰეშთეგით #Moriresign მორის გადადგომას ითხოვენ. პრესკონფერენციაზე მორიმ აღიარა, რომ მისი განცხადებები "შეუფერებელი" იყო, თუმცა ისიც დაამატა, რომ თანამდებობის დატოვებას არ აპირებს.

"ბოლო ხანებია, ქალებს იშვიათად ვესაუბრები, ამიტომ არ ვიცი", — ასე უპასუხა მორიმ კითხვას, თუ რატომ თვლის, რომ ქალები კომიტეტის შეხვედრებზე ბევრს ლაპარაკობენ.

იაპონიის ოლიმპიური კომიტეტის ხელმძღვანელის, კაორი იამაგუჩის შეფასებით, მორის განცხადებები ტოკიოს ოლიმპიადის მთავარ ღირებულებებს უთხრის ძირს:

"გენდერული თანასწორობა და შეზღუდული შესაძლებლობების მქონე პირთა ინტერესების გათვალისწინება ტოკიოს ოლიმპიური თამაშების ამოსავალი წერტილია. საორგანიზაციო კომიტეტის ხელმძღვანელისგან მსგავსი განცხადებების მოსმენა სამწუხაროა".

ტოკიოს ოლიმპიადა 2021 წლის 23 ივლისს დაიწყება და 8 აგვისტოს ჩათვლით გაგრძელდება.