ამერიკის შეერთებული შტატები შეშფოთებას გამოთქვამს რუსი ოპოზიციონერის ალექსეი ნავალნის განაჩენის გამო. ნავალნის სასამართლო პროცესს სახელმწიფო მდივანი, ენტონი ბლინკენი ტვიტერზე გამოეხმაურა.

"კიდევ ერთხელ ვიმეორებთ ჩვენს მოწოდებას მისი დაუყოვნებლივი და უპირობო გათავისუფლების შესახებ, ასევე, ყველა იმ პირის გათავისუფლების შესახებ, რომლებიც უსამართლოდ დააკავეს მათი უფლებების გამოხატვის გამო", — წერს ის.

რუსულმა სასამართლომ ალექსეი ნავალნის პატიმრობა მიუსაჯა. რუსული მედიების ინფორმაციით, ნავალნის სამ წელიწად-ნახევარი მიუსაჯეს. სასჯელს მოაკლდება 10 თვე, რომელიც მან შინაპატიმრობაში გაატარა და საპატიმრო დაწესებულებაში 2 წელი და 8 თვე იქნება.

სასამართლომ მიიჩნია, რომ ნავალნი პირობითი გათავისუფლების წესებს არღვევდა, ამიტომ დარჩენილი ვადა პატიმრობაზე შეუცვალა.

ალექსეი ნავალნი მოსკოვის აეროპორტში 17 იანვარს დააკავეს, როცა ის გერმანიიდან ბრუნდებოდა, სადაც ნოვიჩოკით მოწამვლის შემდეგ მკურნალობდა. დაკავებიდან მეორე დღეს პოლიციის განყოფილებაში გამართულ სასამართლო პროცესზე მას 30-დღიანი პატიმრობა შეუფარდეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რომ ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.