ძაღლი უცნობს იქამდე უყეფდა, სანამ მიტოვებული ჩვილი არ აპოვნინა

კაცი, სახელად ჯანრელ ფუენტეს რევილა, ფილიპინების პროვინცია სებუს მთებში ერთ ჩვეულებრივ დღეს მოტოციკლით გადაადგილდებოდა, როცა არსაიდან ძაღლი ყეფით გამოვარდა და გამოედევნა. შეიძლება, ამის გამო ვინმეს შეშინებოდა, თუმცა ამ ოთხფეხა მეგობარს სინამდვილეში რაღაცის თქმა სურდა.

საბედნიეროდ, ჯანრელმა მოტოციკლი გააჩერა და გადაწყვიტა გაერკვია, თუ რა ხდებოდა. თავდაპირველად მას ეგონა, რომ ძაღლი მშიერი იყო და ეცადა, მისთვის საკვები მიეცა, თუმცა ცხოველს მხოლოდ ის სურდა, რომ უკან გაჰყოლოდნენ.

ასე მიიყვანა ძაღლმა სრულიად უცნობი ადამიანი ნაგავსაყრელთან, სადაც ჯანრელ ფუენტეს რევილამ პირსახოცში გახვეული ჩვილი იპოვა, რომელიც, როგორც ჩანს, ასე მიატოვეს. კიდევ კარგი, ბავშვში ჯერ სრულიად ჯანმრთელი იყო და უახლოეს პოლიციის სამმართველოში მიყვანის შემდეგ მასზე უკვე სპეციალურმა პირებმა დაიწყეს ზრუნვა.

ასე გაითქვა სახელი თავდაპირველად ჯერ ფილიპინებში, შემდეგ კი მთელ მსოფლიოში ძაღლმა, რომლის სახელიც ბლექი აღმოჩნდა.

თავიდან ის ყველას უსახლკარო ძაღლი ეგონა და ადგილობრივმა საქველმოქმედო ორგანიზაცია Hope for Strays-მა მისი დახმარება გადაწყვიტა, თუმცა აღმოჩნდა, რომ მას ძალიან მზრუნველი პატრონები ჰყავს: ოჯახი, სადაც სულ ოთხი ზრდასრული ძაღლი და ხუთი ლეკვი ჰყავთ.

ბლექის მზრუნველი ოჯახი საკმაოდ ხელმომჭირნედ ცხოვრობს, ამიტომ ორგანიზაციამ შემოწირულობებით როგორც მათთვის, ისე ცხოველებისთვის სამყოფი საკვები პროდუქტები მიუტანა.