ევროპარლამენტარი მარია გაბრიელი, რომელიც საქართველოსთვის სავიზო ლიბერალიზაციის მინიჭების განხილვისას მომხსენებელი იყო, რადიო თავისუფლებასთან ინტერვიუში დარჩენილი პროცედურების თარიღებს ასახელებს.

მისი თქმით, შემდეგი ეტაპია ოფიციალური ხელმოწერა, რომელიც 1-2 მარტს გაიმართება და მას მოჰყვება დოკუმენტის გამოქვეყნება ევროკავშირის ოფიციალურ გამოცემაში:

"ეს ალბათ მოხდება 10 მარტამდე, როგორც კი დოკუმენტის გამოქვეყნების ზუსტი თარიღი გვეცოდინება, იმ დღიდანვე დავიწყებთ 20 დღის ათვლას, რომ გადაწყვეტილება ძალაში შევიდეს".

მარია გაბრიელის განცხადებით, უვიზოდ მიმოსვლა მარტის ბოლომდე გახდება შესაძლებელი. მანამდე კი, 13-16 თებერვალს, სტრასბურგში დაგეგმილ პლენრულ სხდომაზე შეჩერების მექანიზმზე გაიმართება კენჭისყრა.

შეჩერების გამარტივებული მექანიზმის ამოქმედება ევროკავშირის წევრ ქვეყნებში, საჭიროების შემთხვევაში, ჭარბ მიგრაციულ ნაკადებს შეაჩერებს. იგი არის სავიზო ლიბერალიზაციის წინაპირობა.

დღეს, ევროპარლამენტმა პლენარულ სხდომაზე, 553 ხმით, 66-ის წინააღმდეგ დაუჭირა მხარი საქართველოს მოქალაქეებისთვის შენგენის ზონაში უვიზოდ მიმოსვლას.