რუსი ოპოზიციონერი, ალექსეი ნავალნის თანაგუნდელი, ვლადიმირ მილოვი ამბობს, რომ ოკუპირებულ აფხაზეთსა და სამხრეთ ოსეთს საქართველოს ნაწილად განიხილავენ. როგორც მან ამერიკის ხმასთან ინტერვიუში აღნიშნა, ნავალნი რუსულ აგრესიას აგვისტოს ომის დროსაც გმობდა და ახლაც.

აღსანიშნია, რომ აგვისტოს ომის შემდეგ ნავალნი საქართველოს ოკუპირებული რეგიონების დამოუკიდებლად აღიარების მომხრე იყო. ამასთან დაკავშირებით, ნავალნის თანაგუნდელი ამბობს, რომ მაშინ სხვა სიტუაცია იყო.

აგვისტოს ომზე გაკეთებული განცხადებების ნაწილზე ნავალნიმ ბოდიში მოიხადა, თუმცა ნაწილზე ამბობდა, რომ იგივე პოზიციაზე რჩება. ჟურნალისტის კითხვაზე, შეიცვალა, მისი პოზიცია თუ არა, მოლოვი პასუხობს:

"როცა საქართველოში, 2008 წლის ომი მოხდა, მე და ის ძალიან ღიად ვჩხუბობდით ინტერნეტში ამ საკითხზე. ჩვენ ეს თემა ხშირად განგვიხილავს მოგვიანებითაც. ერთის მხრივ მისი პოზიცია ამის შემდეგ ძალზედ შეიცვალა. ის, რა თქმა უნდა, ეთანხმება და მე ამას ხშირად ვახმოვანებ, რომ პოსტ-საბჭოთა სივრცის საზღვრების გადახედვა მიუღებელია. ეს მისი პრინციპული პოზიციაა. საჭიროა ასევე მაშინდელი იონტექსტის გათვალისწინება, 2012 წელს მიხეილ სააკაშვილმა შემთხვევით არ წააგო არჩევნები. საქართველოში ვხედავდით ავტორიტარულ ტენდენციებს. [...]

სააკაშვილს ბევრი აღიქვამს, როგორც თავისუფლებისთვის მებრძოლს, მაგრამ მაშინ ეს ასე არ გამოიყურებოდა. გვახსოვს, თავდაცვის მინისტრმა, ირაკლი ოქრუაშვილმა განაცხადა, რომ ცხინვალში შეხვდებოდა ახალ წელს. 2006 წელს თბილისში ვიყავი, სააკაშვილსაც შევხდი. მაშინ განიხილებოდა ასევე ძალადობრივი სცენარები ტერიტორიული პრობლემების გადასაჭრელად. მე და ნავალნის ეს არ მოგვწონდა, ჩვენ ვეწინააღმდეგებით ძალადობრივ სცენარებს. ამიტომ, აქ სიტუაცია უნდა განვიხილოთ ისე, როგორც იყო 2008 წლის აგვისტოში.

თუმცა ნათელია, რომ თავად რუსულ აგრესიას ნავალნი მაშინაც და დღესაც გმობს. არავინ კითხვის ნიშნის ქვეშ არ სვამს საზღვრების უცვლელობის პრინციპს. ჩვენ ყველა, პრინციპულად ვართ პოზიციაზე, რომ აფხაზეთი და სამხრეთ ოსეთი უნდა იყოს განხილული, როგორ საქართველოს ნაწილი. იყო განსხვავებები, პოზიციები შეიცვალა, თუმცა საჭიროა, არ დავივიწყოთ მნიშვნელოვანი ასპექტებიც", — განაცხადა მან.

ალექსეი ნავალნი რუსეთის პრეზიდენტის, ვლადიმერ პუტინის მთავარ ოპოზიციონერად მოიაზრება. ის არაერთხელ დააკავეს პუტინის წინააღმდეგ გამართული საპროტესტო აქციების გამო. რამდენიმე თვის წინ კი მისი მოწამვლაც სცადეს, რაშიც ნავალნი და ევროპელი ლიდერების დიდი ნაწილი პუტინს ადანაშაულებს.


ალექსეი ნავალნი 2020 წლის აგვისტოში მოწამვლის შემდეგ გერმანიაში ცხოვრობდა. აგვისტოში ტომსკი-მოსკოვის რეისზე შეუძლოდ გახდა, რის გამოც თვითმფრინავი სასწრაფოდ დაუშვეს. თავდაპირველად ის ომსკის კლინიკაში მკურნალობდა, თუმცა ორი დღის შემდეგ, ოჯახის მოთხოვნით გერმანიაში, შარიტეს კლინიკაში გადაიყვანეს. რამდენიმე ქვეყნის ლაბორატორიამ დაადასტურა, რომ ოპოზიციონერი ნოვიჩოკის ჯგუფის საწამლავით მოწამლეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რათა ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.

17 იანვარს გერმანიიდან მოსკოვში დაბრუნებული ალექსეი ნავალნი აეროპორტში დააკავეს. სასჯელის აღსრულების ფედერალურ ბიუროს განცხადებით, 2020 წლის 29 დეკემბრიდან გამოსაცდელი ვადის მრავალჯერ დარღვევის გამო ის ძებნაშია.

მას დილამდე ადვოკატთან შეხვედრის საშუალება არ ჰქონია და არც დარეკვის უფლება მისცეს. მისი სასამართლო პროცესი ხიმკის პოლიციის განყოფილებაში ჩატარდა, რაც მოულოდნელი იყო თვითონ ნავალნისთვისაც. სასამართლოს პარალელურად მხარდამჭერები პოლიციის შენობის გარშემო შეიკრიბნენ და მის გათავისუფლებას მოითხოვდნენ.