იუსტიციის მინისტრის მოადგილე, ბექა ძამაშვილი, აცხადებს, რომ სტრასბურგის სასამართლოს გადაწყვეტილება მნიშვნელოვანია არა მხოლოდ სამართლებრივი თვალსაზრისით, არამედ იმიტომაც, რომ ამით სხვა სახელმწიფოებს ეძლევათ მყარი სამართლებრივი საფუძველი, მხარი დაუჭირონ საქართველოს ტერიტორიულ მთლიანობას.

"გარდა იმისა, რომ ცალკეული მუხლების დარღვევა დადგინდა, რაც ძალიან მნიშვნელოვანია და ამ სასამართლომ დაადგინა, რომ 2008 წლის ომის დროს სიმართლე საქართველოს მხარეს იყო და მსხვერპლი ამ ომის იყო საქართველოს მოსახლეობა და საქართველოს სახელმწიფო, მნიშვნელოვანი იმითაც არის, რომ მომავალში უკვე სხვა სახელმწიფოებს, ჩვენს პარტნიორებს, მიეცემათ მყარი სამართლებრივი არგუმენტი, რომ უფრო თამამად და უფრო მყარად დაუჭირონ მხარი ჩვენი ქვეყნის ტერიტორიულ მთლიანობას", — განაცხადა ძამაშვილმა რუსთავი 2-ის ეთერში.

ძამაშვილის განმარტებით, ეს არის პირველი შემთხვევა, როცა სამართლებრივ დოკუმენტში ჩაიწერა, რომ რუსეთი არის ოკუპანტი.

ადამიანის უფლებათა ევროპული სასამართლოს დიდმა პალატამ აგვისტოს 2008 წლის ომზე საქართველოს ძირითადი სარჩელი დააკმაყოფილა. სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა. სასამართლოს დიდმა პალატამ, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

საქართველოს იუსტიციის სამინისტროს განცხადებით, ამ და სხვა დარღვევების აღიარებით, 2008 წლის აგვისტოს ომის დროს რუსეთის მიერ ქართველების წინააღმდეგ განხორციელებული ეთნიკური წმენდა დასტურდება.

გაიგეთ მეტი: