გირჩის ლიდერის, იაგო ხვიჩიას განცხადებით, სტრატეგია აღმაშენებლის ლიდერის, გიორგი ვაშაძეს "თავისი ამაზრზენი საქციელის" გამო ბოდიშის მოხდა მოუწევს. როგორც ხვიჩიამ განმარტა, ის გულისხმობს ვაშაძის მხრიდან პირობების დარღვევას, შეხვედრასა და ლაპარაკზე უარის თქმას.

"გიორგი ვაშაძეს, ჩემი აზრით, თავის ამაზრზენ საქციელზე მოუწევს ბოდიშის მოხდა. სხვა შემთხვევაში, მას სულ ასე მოუწევს დამალვა", — განაცხადა ხვიჩიამ გადაცემა 360 გრადუსში.

ხვიჩიას განმარტებით, გირჩმა დაისახა მიზნად, პოლიტიკური სპექტრი ერთმანეთს დაელაპარაკებინა და მისი მოსაზრებით, ეს გამოუვიდათ.

"ბატონი გიორგი ვაშაძემაც იცის ეს. და გიორგი ვაშაძეს ამ წარმატების უკან წაღება უნდა. მე არ მჯერა იმ ოპოზიციის, რომელიც ერთმანეთთან არ ლაპარაკობს, რომელიც ერთმანეთთან არ ჯდება. ჩვენი სიძლიერე არის ლაპარაკი, ეს არის ადგილი, პროფესია, სადაც ან საჯარო სივრცეში ლაპარაკობ, ან გაქრები. გიორგი ვაშაძესაც მოუწევს ამ წესების დამორჩილება", — აღნიშნა მან.

ხვიჩიას თქმითვე, "ამ საქციელის ჩადენა" პირველმა, გიორგი ვაშაძემ "გაბედა", რის გამოც სანიმუშოდ უნდა დაისაჯოს, რათა სხვამ იგივე არასდროს ჩაიდინოს:

"[სანიმუშოდ დასჯა] ნიშნავს, რომ მან ელექტორალურად უნდა ნახოს ზიანი საკუთარი სიტყვის გატეხვის გამო".