ლელოს ერთ-ერთი ლიდერი, საბა ბუაძე აცხადებს, რომ პარტია საერთო ოპოზიციური ფორმატის მიღმა, ინდივიდუალურ მოლაპარაკებებს არ გეგმავს.

"ცალკე, ამ საერთო დღისწესრიგის მიღმა ჩვენ არ ვაპირებთ რაიმე კონსულტაციების წარმოებას, ვინაიდან, ამის საჭიროება დღეს არ არსებობს", — განაცხადა საბა ბუაძემ.

ოპოზიციურ პარტიებს შორის ინდივიდუალური მოლაპარაკებების ინიციატორები პარტიები — გირჩი და მოქალაქეები არიან. სწორედ ეს ორი პარტია განიხილავს აქტიურად იდეას, 2021 წლის ადგილობრივი თვითმმართველობის არჩევნების პლებისციტად განხილვის შესახებ. გირჩის ერთ-ერთმა ლიდერმა, იაგო ხვიჩიამ განაცხადა, რომ მას კომუნიკაცია ჰქონდა ოპოზიციურ პარტიის წარმომადგენლებთან, მათ შორის ლელოს გენერალურ მდივანთან, ბადრი ჯაფარიძესთან და ეს იდეა მათ არ უარყიათ.

"ქართულმა ოცნებამ ძალიან ერთმნიშვნელოვანი პასუხი გასცა ალეკო ელისაშვილს და მის მიერ შემოთავაზებულ ამ მოდელს და მათ თქვეს, რომ ამის განხილვა არ იქნება. შესაბამისად, ჩვენთვის ეს საკითხი არის დახურული", — განაცხადა საბა ბუაძემ.

გირჩსა და მოქალაქეებთან ინდივიდუალურ კონსულტაციებზე გუშინ, საჯაროდ თქვა უარი სტრატეგია აღმაშენებლის ლიდერმა, გიორგი ვაშაძემაც. მისი ერთ-ერთი არგუმენტიც, ბუაძის მსგავსად, იყო ის, რომ ოპოზიციამ შეთანხმებას საერთო ფორმატში უნდა მიაღწიოს და არა ინდივიდუალურ მოლაპარაკებებზე.

მოქალაქეებისა და გირჩის ეს იდეა შეაფასა გირჩის ყოფილმა და ახლა უკვე პარტია გირჩი — მეტი თავისუფლების ლიდერმა, ზურაბ ჯაფარიძემაც. მისი თქმით, ოპოზიციურ სპექტრში ამ იდეაზე შეთანხმების და შემდეგ, ქართული ოცნების თანხმობის შანსი ნულის ტოლია.

იდეა, რომელსაც ბოლო პერიოდში აქტიურად ლობირებენ გირჩისა და მოქალაქეების ლიდერები, გულისხმობს, რომ თუ თვითმმართველობის არჩევნებში ოპოზიცია გაიმარჯვებს, უნდა ჩატარდეს ვადამდელი საპარლამენტო არჩევნები, თუ მმართველი პარტია — ვადამდელი საპარლამენტო არჩევნების ჩატარებას აზრიც ეკარგება.

გაიგეთ მეტი: