გირჩის ერთ-ერთი ლიდერი, იაგო ხვიჩია აცხადებს, რომ ის ხალხი, რომელმაც არჩევნების შედეგების გაპროტესტების მიუხედავად, დაფინანსება მიიღო, მის "პედესტალზე" ვერ დადგება. ამის შესახებ მან TV პირველის ეთერში ისაუბრა.

"უცბად აღმოვაჩინე, რომ ყველა მონაწილე ჩვენ გარდა [ალეკო არ ესწრებოდა] ფულს იღებს და ამბობს, რომ ეს ჩვეულებრივი ამბავია, ჩვენ ფული უნდა ავიღოთ, მიუხედავად იმისა, რომ ბოიკოტი გვაქვსო. ამაზე მე და ბატონმა [გიგა] ბოკერიამ ვიკამათეთ ცხარედ ამ თემასთან დაკავშირებით. მე საჯაროდ ვუთხარი, რომ სულ მექნება მორალური პედესტალი და ეს გაითვალისწნე. ასე ვიმოძრავებ, ეს ხალხი, რომელიც ფულს იღებს გაყალბებული არჩევნების შედეგად, რომლის შედეგსაც ასაჩივრებს, ეგ ხალხი ჩემს პედესტალზე ვერ დადგება"

მისივე თქმით, დაფინანსებაზე უარი იმიტომ თქვა, რომ "ბოიკოტი არ ყოფილიყო შერყვნილი", თუმცა სხვა პარტიების მიერ დაფინანსების აღებამ ბოიკოტი "შერყვნა".

"3 მილიონ-ნახევარზე ვამბობთ უარს. თქვენ ფიქრობთ, რომ მე ისეთი მდიდარი ადამიანი ვარ, რომ სამ მილიონ-ნახევარი არ მჭირდება? მაგრამ უარი ვთქვით იმიტომ, რომ ბოიკოტი ყოფილიყო წმინდა და არ ყოფილიყო შერყვნილი და პირველი აქ გაირყვნა ბოიკოტი", — ამბობს ხვიჩია.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. პარტია მოქალაქეები და გირჩი სანამ ბოიკოტის რეჟიმში არიან, დაფინანსებაზე უარს ამბობენ.