რუსი ოპოზიციონერი ალექსეი ნავალნის სასამართლო პროცესი ხიმკის პოლიციის განყოფილებაში გაიმართება. ე.წ. სასამართლო დარბაზიდან პოლიტიკოსის ვიდეოც გავრცელდა. ამ დრომდე მას ადვოკატებთან შეხვედრის საშუალება არ ჰქონია.

"მე ვერ ვიგებ, რა ხდება. ერთი წუთის წინ გამომიყვანეს კამერიდან ადვოკატებთან შესახვედრად. აქ მოვედი და ხიმკის სასამართლო სხდომა მიმდინარეობს. ვიღაც ხალხი მიღებს კამერაზე, ვიღაც ხალხი ზის დარბაზში. ამაზე ამბობენ, რომ ეს ხიმკის სასამართლოს ღია სხდომაა, სადაც განიხილავენ ჩემს პატიმრობაში დატოვების საკითხს. რატომ მიმდინარეობს სასამართლოს სხდომა პოლიციაში, არ მესმის", — ამბობს ნავალნი.

ნავალნის შტაბის ხელმძღვანელის, ლეონიდ ვოლკოვის თქმით, ადვოკატს შეატყობინეს, რომ მოსამართლე პირდაპირ პოლიციის განყოფილებაში მივიდოდა. ამასთან, სოციალურ ქსელებში უკვე გავრცელდა ფოტოები სხდომიდან.

ერთ-ერთ ადგილობრივ გამოცემას ხიმკის საქალაქო სასამართლომ განუმარტა, რომ გასვლითი სხდომა იმ მიზეზით მოაწყვეს, რომ მასზე ჟურნალისტებს დასწრების საშუალება ჰქონოდათ, რადგან პანდემიის გამო, სასამართლო დარბაზში მათ არ დაუშვებდნენ.

თუმცა როგორც BBC-ის რუსული გამოცემა წერს, ხიმკის პოლიციასთან მისულ ჟურნალისტებს პროცესზე არ უშვებენ. თვითონ ალექსეი ნავალნიმ სხდომაზე სიტყვით გამოსვლისას მოითხოვა, იქ მყოფი რამდენიმე ტელევიზიის გარდა "რეალური ჟურნალისტები" დაეშვათ, რომლებიც გარეთ ელოდებიან.

17 იანვარს გერმანიიდან მოსკოვში დაბრუნებული რუსი ოპოზიციონერი, ალექსეი ნავალნი აეროპორტში დააკავეს. სასჯელის აღსრულების ფედერალურ ბიუროს განცხადებით, ნავალნი 2020 წლის 29 დეკემბრიდან გამოსაცდელი ვადის მრავალჯერ დარღვევის გამო ძებნაშია.

ნავალნი აგვისტოში მოწამლეს. თავდაპირველად ის ომსკის კლინიკაში მკურნალობდა, თუმცა ორი დღის შემდეგ, ოჯახის მოთხოვნით გერმანიაში, შარიტეს კლინიკაში გადაიყვანეს. რამდენიმე ქვეყნის ლაბორატორიამ დაადასტურა, რომ ოპოზიციონერი ნოვიჩოკის ჯგუფის საწამლავით მოწამლეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რათა ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.