ბონგ ჯუნ ჰო კვლავ აგრძელებს ისტორიის ფურცლებზე საკუთარი სახელის უკდავყოფას: სულ ცოტა ხნის წინ ცნობილი გახდა, რომ ის 2021 წლის ვენეციის კინოფესტივალის ჟიურის თავმჯდომარე იქნება.

პარაზიტის, ოკჯას და კიდევ სხვა არაერთი გახმაურებული ფილმის შემოქმედი პირველი სამხრეთკორეელი ადამიანი იქნება, რომელიც მსოფლიოში ერთ-ერთი ყველაზე ცნობილი კინოფესტივალის შვიდკაციან ჟიურის უხელმძღვანელებს და წლის ფავორიტ ფილმებსა და ხელოვანებს დაასახელებს.

"ვენეციის საერთაშორისო კინოფესტივალს გრძელი და მრავალფეროვანი ისტორია აქვს და ჩემთვის დიდი პატივია, რომ კინოსამყაროს ამ საოცარი ტრადიციის ნაწილი გავხდები. როგორც ჟიურის თავმჯდომარე, უფრო მეტად კი კინოს გულმხურვალე მოყვარული, მზად ვარ, რომ დავტკბე და პატივი მივაგო იმ ყველა შესანიშნავ ფილმს, რომელიც ამ ფესტივალზე მოხვდება", — ამ განცხადებით გამოეხმაურა ბონგ ჯუნ ჰო კინოფესტივალზე ჟიურის თავმჯდომარედ მის დასახელებას.

შეგახსენებთ, რომ ეს პირველი შემთხვევა არ არის, როცა ბონგ ჯუნ ჰომ ერთგვარი რეკორდი მოხსნა თავისი პირველობით: ჯერ იყო და მის ფილმს პარაზიტი კანის კინოფესტივალზე 2019 წელს ოქროს პალმის რტო გადაეცა, რითიც ის პირველი სამხრეთკორეელი რეჟისორი გახდა, რომელსაც ეს პრიზი მიუღია; შემდეგ კი ოსკარებზე ნამდვილი ტრიუმფატორი აღმოჩნდა: თითქმის ყველა მთავარ ნომინაციაში გამარჯვებასთან ერთად, პარაზიტი წლის საუკეთესო ფილმად დასახელდა, რაც ოსკარების ისტორიაში პირველი შემთხვევაა, როცა არაინგლისურენოვან ფილმს გადაეცა ეს ჯილდო.

ვენეციის კინოფესტივალის წინა ჟიურის თავმჯდომარე ქეით ბლანშეტი იყო: ის იყო მერვე ქალი, რომელმაც თითქმის 80-წლიანი ისტორიის მქონე ფესტივალს უხელმძღვანელა. მისი მეთაურობით 2020 წლის ფავორიტ ფილმად ქლოი ჩჟაოს Nomadland დასახელდა.

ვენეციის წლევანდელი, 2021 წლის კინოფესტივალი 1-11 სექტემბერსაა დაგეგმილი და ვნახოთ, ვინ გახდება ბონგ ჯუნ ჰოს ფავორიტი.

ასევე იხილეთ: