"ჩემო მეგობარო ალეკო, ჩემს უკანონო დაკავებაში და ასევე უკანონო პატიმრობაში, პასუხისმგებლობა ეკისრება ერთადერთ ადამიანს — ბიძინა ივანიშვილს", — ასე პასუხობს მთავარი არხის დამფუძნებელი, გიორგი რურუა პარტია მოქალაქეების ლიდერს, რომელმაც განაცხადა, რომ რურუა პატიმრობაში ოპოზიციის გამო რჩება. რურუას წერილი მის ფეისბუქგვერდზე გამოქვეყნდა.

"მადლობა მინდა გადავუხადო არასამთავრობო ორგანიზაციებს, დამოუკიდებელ მედიას და პრინციპულ ოპოზიციას, რომლებიც მეხმარებიან ჩემი უდანაშაულობის დადგენაში.
და ბოლოს, მინდა განვაცხადო,რომ სრულად მხარს ვუჭერ დასავლური ოპოზიციური პარტიების პოზიციას. ბიძინა ივანიშვილის პირადი პოლიტპატიმარი გიორგი რურუა",— წერს ის.

ალეკო ელისაშვილის თქმით, პოლიტპატიმრების გამოშვება უკვე დაწყებულია, რის ფარგლებშიც, გამოშვებულია ორი ადამიანი — აკაკი ხუსკივაძე და აკაკი კობალაძე, ხოლო გიორგი რურუა პატიმრობაში მხოლოდ ოპოზიისვე ქმედებების გამო რჩება.

"თუ შეთანხმება შედგა, მე მგონია, რომ დანარჩენებიც გამოვლენ. მოლაპარაკების პერიოდში გამოვიდა ეს 2 ადამიანი, მოლაპარაკების შედეგია ეს, ვიღაცის ფეხის ბაკუნით კი არ გამოსულან, ჩვენ რომ ქართულ ოცნებას ველაპარაკებოდით მკაცრად, ელჩების თანდასწრებით, იმიტომ გამოვიდნენ", — ამბობს ელისაშვილი.

მთავარი არხის მეწილე, გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. სასამართლომ მას 4-წლიანი პატიმრობა შეუფარდა.

ოპოზიცია რურუას პოლიტპატიმრად მიიჩნევს, მმართველი პარტია ქვეყანაში პოლიტპატიმრების არსებობას უარყოფს.