ახალი ზელანდიის სამხრეთ კუნძულის სიდიდით მეორე ქალაქში, ზღვის ლომის და ახალშობილის სიმშვიდისთვის, გადატვირთული გზა მთელი თვით გადაიკეტება.

ქალაქ დანიდინის მერიამ ფეისბუკზე პოსტი გამოაქვეყნა და ხალხს ამცნო, რომ ჯონ უილსონის სანაპიროსთან მდებარე გზა ერთი თვით დაიკეტება, რათა "გამორჩეულმა მაცხოვრებლებმა გზით სარგებლობა უსაფრთხოდ შეძლონ".

"ახალზელანდიური ზღვის ლომი და მისი შვილი გოლფის მინდორთან დასახლდნენ და გზის გადაკვეთა რეგულარულად უწევთ, რათა სანაპირომდე მივიდნენ", — აღნიშნა მერიამ და დაამატა — "სანაპიროთი სარგებლობას ისევ შეძლებთ, ამისთვის ველოსიპედის გამოყენება ან ფეხით გადაადგილება მოგიწევთ. ჩვენი თხოვნაა, ზღვის ლომს სივრცე არ დაურღვიოთ და 20 მეტრზე ახლოს არ მიუახლოვდეთ. ახალზელანდიური ზღვის ლომები გადაშენების საფრთხის ქვეშ არიან და მსოფლიოში ერთ-ერთი უიშვიათესი სახეობაა".

ზაფხულობით, 120 000 მცხოვრებით დასახლებული საპორტო ქალაქის გზა 1-2 დღით ხშირად იკეტება, რათა ველური ბუნების წარმომადგენლებმა მშვიდად გადაადგილება შეძლონ. ადგილობრივებმა გზის ერთი თვით გადაკეტვა მოიწონეს. ნაწილმა მუდმივი აკრძალვის სურვილიც გამოთქვა.

ახალზელანდიური ზღვის ლომები ძაღლების და ადამიანების ხშირი თავდასხმის სამიზნე არიან. დანიდინში, ცხოველთა გამრავლების პროცესი დანიდინში 1993 წლიდან დაიწყო. დაცვის მცდელობებმა შედეგი გამოიღო და მათი მაკეობის პერიოდი ამ ქალაქის ზაფხულის პერიოდის ნაწილად იქცა. წელს, ქალაქი სულ მცირე 20 ზღვის ლომის დაბადებას ელის.

კონსერვაციის დეპარტამენტის მონაცემებით, 12 000-მდე ახალზელანდიური ზღვის ლომია დარჩენილია და გამრავლების უნარის მქონე პოპულაციის დიდი ნაწილი მეთევზეების, დაავადებების, საკვების არქონის, ადამიანური ჩარევების გამო საფრთხეშია.

კორონავირუსის გავრცელებამდე, აბეზარი ტურისტები ცხოველებს სიმშვიდეს ურღვევდნენ — სანაპიროზე რუჯს იღებდნენ და ცხოველებს ფოტოებით აწუხებდნენ.