ჩოხატაურის მუნიციპალიტეტის სოფელ ბუკნარში ხანმოკლე დაპირისპირება იყო. ვითარება მას შემდეგ დაიძაბა, რაც ადგილზე ქართული ოცნების დეპუტატი, ვასილ ჩიგოგიძე და ნაციონალური მოძრაობიდან ოზურგეთის საკრებულოს წევრი, ბესო ქათამაძე გამოჩნდნენ.

ვასილ ჩიგოგიძე სოფელში მართლმადიდებელ მოსახლეობას ხვდებოდა. მასთან ბესო ქათამაძე მივიდა, რომელმაც მოითხოვა, დადებულიყო შეთანხმება, რომ სოფელში მეჩეთი არ აშენდებოდა. ბესო ქათამაძის თქმით, წინასაარჩევნოდ ჩიგოგიძე მუსლიმ თემს დაჰპირდა, რომ მეჩეთი აშენდება.

როგორც On.ge-ს ჟურნალისტი ადგილიდან იტყობინება, სწორედ ამის განხილვას მოჰყვა დაპირისპირება.

სიტყვიერი დაპირისპირების შემდეგ, ბესო ქათამაძე ადგილს განარიდეს. ამ დროისთვის სოფელში სიმშვიდეა. ადგილზე მობილიზებულია პოლიცია.

ტვ პირველთან აჭარის პოლიციის უფროსმა, კონსტანტინე ანანიაშვილმა განაცხადა, რომ კანონის მიხედვით იმოქმედებენ. მისივე თქმით, ადგილზე რაიმე განსაკუთრებულ ზომებს ადგილი არ აქვს.

როგორც ცნობილია, იგეგმება, რომ სოფლის მუსლიმი და მართლმადიდებელი მოსახლეობა პარასკევის ლოცვის შემდეგ ერთმანეთს შეხვდება. შეხვედრაში მონაწილეობას მიიღებენ როგორც თემის წარმომადგენლები, ისე მაჟორიტარი დეპუტატი, გუბერნატორი და სასულიერო პირები ორივე მხრიდან.

ფოტო: On.ge / თამთა კახაბერიძე

მუსლიმებსა და მართლმადიდებლებს შორის რელიგიურ ნიადაგზე კონფლიქტი 12 იანვარს დაიწყო. ადამიანის უფლებების სწავლებისა და მონიტორინგის ცენტრის (EMC) ინფორმაციით, ბუკნარში მეზობლებს შორის მომხდარი ურთიერთშელაპარაკების დროს მძიმე ფიზიკური დაზიანებები მიაყენეს სამ მუსლიმს, მათ შორის ბავშვებს. დაშავებულები კი მიღებული არაერთი დაზიანებით საავადმყოფოში გადაიყვანეს.

პრემიერმინისტრი გიორგი გახარია აცხადებს, რომ მოქალაქეებს შორის რელიგიურ ნიადაგზე დაპირისპირების პროვოცირების საშუალებას სახელმწიფო არავის მისცემს.

ბუკნარში მომხდარ დაპირისპირებას გამოეხმაურა სახალხო დამცველი. ნინო ლომჯარიამ სოფელში განვითარებულ მოვლენებს სამწუხარო ფაქტი უწოდა და აღნიშნა, რომ მსგავსი შემთხვევა პირველი არ არის, სახელმწიფოს კი თითოეული მოქალაქის ლოცვის უფლების დაცვისკენ მოუწოდა.

EMC-ში აცხადებენ, რომ მომხდარ ინციდენტში 2 ძირითადი სამართლებრივი საკითხი იკვეთება — ძალადობის შემთხვევა დაზარალებული მუსლიმი პირების მიმართ, რომელიც დროულ და ეფექტიან სამართლებრივ რეაგირებას ითხოვს და სალოცავი სივრცის ფუნქციონირებისთვის უსაფრთხო და მშვიდობიანი პირობების შექმნა.

ევანგელისტურ-ბაპტისტური ეკლესია ხელისუფლებას მოუწოდებს, არა მხოლოდ ბუკნარის, არამედ დღემდე მომხდარ ყველა ინციდენტზე გამოძიება დაუყოვნებლივ დაიწყოს. მათი განცხადებით, ქვეყანას, სადაც ახალგაზრებს ლოცვისათვის თავს უტეხავენ, მომავალი არ აქვს.

შინაგან საქმეთა სამინისტროს ცნობით, დააკავეს პირი, რომელმაც 12 იანვარს ბუკნარში ორ თანასოფლელს ქვის გამოყენებით თავის არეში დაზიანებები მიაყენა. მათივე განცხადებით, გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს და 6 თვიდან 1 წლამდე ვადით თავისუფლების აღკვეთას ითვალისწინებს.

გაიგეთ მეტი: