რუსეთის სასჯელის აღსრულების ფედერალურმა სამსახურმა სასამართლოს მიმართა, ოპოზიციონერ ალექსეი ნავალნის პირობითი მსჯავრი რეალურით შეეცვალოს. ამის შესახებ ინფორმაცია თვითონ ნავალნიმ გაავრცელა, რომელიც აგვისტოში ნოვიჩოკით მოწამვლის შემდეგ გერმანიაში მკურნალობს.

როგორც ნავალნი ტვიტერზე წერს, შუამდგომლობა დაკისრებული მოვალეობების შეუსრულებლობის, ზიანის ანაზღაურების თავიდან აცილების ან ახალი დანაშაულის ჩადენის საფუძველზე 11 იანვარს დარეგისტრირდა.

"პუტინი ისე განრისხდა რომ მოწამვლის შემდეგ გადავრჩი, სასჯელის აღსრულების ფედერალურ სამსახურს დაავალა სასამართლოში წავიდეს და ჩემი პირობითი მსჯავრის შეცვლა მოითხოვოს", — წერს ოპოზიციონერი და ამატებს, რომ მისი პირობითი მსჯავრის ვადა 30 დეკემბერს გავიდა.

BBC-ის რუსული სამსახურის ინფორმაციით, 28 დეკემბერს სასჯელის აღსრულების ფედერალური სამსახური ნავალნის პირობითი მსჯავრის შეცვლით დაემუქრა, რომელიც მან რომ ივ როშეს საქმეზე 2014 წელს მიიღო — ხუთი წელი და დამატებით გამოსაცდელი ვადა. ამ უკანასკნელის ვადა 2019 წელს გავიდა, თუმცა ფედერალურმა სამსახურმა მისი გახანგრძლივება 2020 წლის ბოლომდე მოითხოვა.

აქამდე სამსახურს არაერთხელ მიუმართავს სასამართლოსთვის, რომ ნავალნის მიმართ არსებული ზომები გაემკაცრებინათ, თუმცა უარს იღებდა. ამჯერად უწყებაში აცხადებდნენ, რომ ოპოზიციონერი რუსეთის ფარგლებს გარეთ ყოფნის გამო აღწერაზე სათანადოდ არ ჩნდებოდა.

გარდა ამისა, დეკემბერში რუსეთში ნავალნის წინააღმდეგ თაღლითობის ბრალდებით გამოძიება დაიწყეს. აქამდე ოპოზიციონერს არაერთხელ უთქვამს, რომ რუსეთის ხელისუფლება ხელს უშლის მას, ქვეყანაში დაბრუნდეს.