პარლამენტში უმრავლესობის ლიდერის, ირაკლი კობახიძის განცხადებით, არჩევნებთან დაკავშირებით დროებითი საგამოძიებო კომისია თებერვლის პირველ კვირაში შეიქმნება. ამის შესახებ მან პარტიის ოფისში ბრიფინგზე განაცხადა.

როგორც კობახიძემ აღნიშნა, საპარლამენტო საქმიანობაში ჩაერთო პარტია ევროპელი სოციალისტები, რამაც "საბოლოოდ ჩამოშალა რადიკალური ოპოზიციის მიერ დაგეგმილი ერთპარტიული პარლამენტის სცენარი".

"ამ ვითარებაში პარლამენტის საბოტაჟის გაგრძელებამ ყოველგვარი რაციონალური საფუძველი დაკარგა. მიუხედავად ამისა, ვხედავთ, რომ შედარებით ჯანსაღ ოპოზიციურ ძალებსაც კი შანტაჟის შიშის გამო კიდევ უჭირთ ნაბიჯის გადადგმა და დემოკრატიულ საპარლამენტო პროცესში ჩართვა. კიდევ ერთხელ ვთავაზობთ ოპოზიციას ჩაერთონ საპარლამენტო საქმიანობაში და საპარლამენტო საგამოძიებო კომისიის მუშაობაში, რათა ნათელი მოვფინოთ სიმართლეს არჩევნებთან დაკავშირებით", — აღნიშნა კობახიძემ.

მისივე თქმით, საგამოძიებო კომისიის მუშაობაში ისინი ყველა ადგილობრივ და საერთაშორისო სადამკვირვებლო ორგანიზაციას მიიწვევენ, მათ შორის ეუთო/ოდირს. ამასთან, კობახიძე აღნიშნავს, რომ ძალაში რჩება მათი პირობა, რომ თუნდაც 1-პროცენტიანი გადახრის აღმოჩენის შემთხვევაში ქართული ოცნება რიგგარეშე საპარლამენტო არჩევნებს დანიშნავს, ხოლო თვითონ პოლიტიკურ საქმიანობას ჩამოშორდება.