დააკავეს კაცი, რომელიც კაპიტოლიუმში შეჭრის დღეს აშშ-ს წარმომადგენელთა პალატის სპიკერის კაბინეტში მაგიდაზე ფეხებშემოწყობილი დააფიქსირეს. როგორც NBC News წერს, 60 წლის რიჩარდ ბარნეტი თავის მშობლიურ შტატ არკანზასში 8 იანვარს დილით დააკავეს.

მას ბრალად ედება აკრძალულ ტერიტორიაზე შესვლა, ძალადობრივი შეღწევა და სახელმწიფო ქონების ქურდობა.

ბარნეტის ფოტო პელოსის ოფისიდან სოციალურ ქსელებში სწრაფად გავრცელდა. როგორც მან შემდგომში კაპიტოლიუმის გარეთ ჟურნალისტებს უთხრა, პალატის სპიკერს მაგიდაზე წერილიც დაუტოვა.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

რამდენიმესაათიანი არეულობის შემდეგ სენატში სხდომა განახლდა. ბოლო ინფორმაციით, ხუთი ადამიანი გარდაიცვალა, მათ შორის ერთი პოლიციელი. ერთ-ერთ ქალს კაპიტოლიუმში პოლიციამ შეჭრის დროს ესროლა.

დონალდ ტრამპი თავის მომდევნო განცხადებებში ძალადობას გმობდა, თუმცა ამავე დროს კაპიტოლიუმში შეჭრილებს "განსაკუთრებულს" უწოდებდა და ამბობდა, რომ ისინი უყვარს. კიდევ ერთ პოსტში მეორეში კი მათ საქციელს ამართლებდა და აცხადებდა, რომ ასე იქცევიან ადამიანები, რომლებსაც არჩევნები წაართვეს. ტრამპის ეს განცხადებები ძალადობის წახალისებად შეფასდა. ამის გამო ტრამპის ანგარიშები რამდენიმე სოციალურ ქსელში დაიბლოკა. ხოლო ფეისბუქი და ინსტაგრამი მას ბლოკს ინაუგურაციამდე არ მოხსნის.

ტრამპის მხარდამჭერების მიერ ორგანიზებული არეულობის მიუხედავად, 7 იანვარს, აშშ-ს კონგრესმა საპრეზიდენტო არჩევნებში დემოკრატი ჯო ბაიდენის გამარჯვება ოფიციალურად დაამტკიცა.

არჩეული პრეზიდენტი, ჯო ბაიდენი და არჩეული ვიცე-პრეზიდენტი, კამალა ჰარისი უფლებამოსილებას 20 იანვარს, ინაუგურაციის შემდეგ შეუდგებიან. მანამდე კი ხელისუფლების გადაბარების პროცესი იქნება. ცნობილი გახდა, რომ დონალ ტრამპი ინაუგურაციაზე დასწრებას არ აპირებს.

გაიგეთ მეტი: