ყველას მოგვისმენია მშობლების და თუნდაც 90-იანების თაობის წარმომადგენლების წუწუნი იმასთან დაკავშირებით, რომ ბავშვებს თამაში აღარ აინტერესებთ და უკვე პატარა ასაკიდან ტელეფონს ან პლანშეტს ხელიდან ვერ გააგდებინებთ.

მომავალ თაობებს რომ რეალურ თამაშებს ვირტუალური ურჩევნიათ ამას უკვე ყველა შეეგუა, მაგრამ LEGO არის პირველი კომპანია, რომელმაც გადაწყვიტა, რომ ბავშვები, რომლებიც იზრდებიან და კუბიკებით თამაშიდან პირდაპირ ტელეფონებსა და კომპიუტერებზე ინაცვლებენ არ დაკარგოს და მათთან იმ სივრცეში იურთიერთოს, რომელშიც ყველაზე მეტ დროს ატარებენ.

სწორედ ამიტომ ასაწყობი სათამაშოების კომპანიამ ინსტაგრამის მსგავსი სოციალური ქსელი შექმნა, რომელშიც 5-დან 13 წლამდე ბავშვებს შეუძლიათ დარეგისტრირება და თავიანთი აშენებული კონსტრუქციების გაზიარება.

ფოტო: LEGO

ცხადია, ასეთი სოციალური ქსელი შესაძლოა პატარებისთვის დიდ საფრთხეებს შეიცავდეს, მაგრამ ლეგოს ეს პრობლემაც გადაჭირილი აქვს. მომხმარებლის ქცევას მოდერატორები აკონტროლებენ და ფოტოებს, რომლებიც ბავშვების იდენტობას, სახეს, მისამართს ან რამე სხვა მონაცემს შეიცავს მაშინვე ბლოკავენ. ასევე შეუძლებელია ერთმა მომხმარებელმა მეორეს მისწეროს, შესაბამისად ამ ქსელის საშუალებით პატარებს საეჭვო პიროვნებები ვერ დაეკონტაქტებიან.

აპლიკაცია ჯერჯერობით მხოლოდ აშშ-ში, კანადასა და რამდენიმე ევროპულ ქვეყანაშია ხელმისაწვდომი.