პარლამენტის დეპუტატის, გიორგი ხელაშვილის განცხადებით, სახელმწიფო ინსტიტუტებზე თავდასხმა, არჩევნების გაყალბებასთან დაკავშირებული ტყუილები და შემდეგ მათი სახელმწიფო ინსტიტუტებზე იერიშისთვის გამოყენება მიუღებელია. მისივე აზრით, საერთაშორისო პარტნიორები ახლა უფრო გაგებით მოეკიდებიან და სწორად გაიგებენ იმას, რასაც ეუბნებოდნენ. აღნიშნული განცხადება ხელაშვილმა გუშინ, 6 ნოემბერს ამერიკის შეერთებულ შტატებში განვითარებულ მოვლენებთან დაკავშირებით გააკეთა.

"ეს იყო თავდასხმა არამარტო ამერიკის კონგრესზე, არამედ ამერიკულ დემოკრატიაზე. უკვე ცხადად შეიძლება ითქვას, რომ ეს წინასწარი განზრახვით მოხდა. სახელმწიფო ინსტიტუტებზე თავდასხმა, ტყუილები, რომელიც დაკავშირებულია გაყალბებულ არჩევნებთან და მერე ამ ტყუილების საბაბად გამოყენება იმისთვის, რომ ისევ სახელმწიფო ინსტიტუტებზე მიიტანო იერიში, ეს არის მიუღებელი, რა თქმა უნდა და ვფიქრობ, რომ ჩვენი საერთაშორისო პარტნიორები ახლა უფრო მეტად ვიდრე ადრე გაგებით მოეკიდებიან და სწორად გაიგებენ იმას, რასაც ჩვენ ამდენი ხანია ვეუბნებოდით", — ამბობს ხელაშვილი.

აშშ-ს კონგრესმა საპრეზიდენტო არჩევნებში დემოკრატი ჯო ბაიდენის გამარჯვება ოფიციალურად დაამტკიცა. ამას წინ უძღვოდა რამდენიმესაათიანი განხილვა და არეულობა, რომელიც პრეზიდენტ დონალდ ტრამპის მხარდამჭერებმა გამოიწვიეს.

სენატმა და წარმომადგენლობითმა პალატამ უარყვეს მოთხოვნები ჯორჯიასა და პენსილვანიაში ბაიდენისთვის ხმების გაუქმებასთან დაკავშირებით. რესპუბლიკური პარტიის წარმომადგენლები ასევე აპროტესტებდნენ არიზონას, ნევადისა და მიჩიგანის შედეგებსაც.

საბოლოოდ კონგრესმა ამომრჩეველთა კოლეგიის ხმების დაამტკიცა, რომელიც ასე გადანაწილდა:

• ჯო ბაიდენი — 306;
• დონალდ ტრამპი — 232.

არჩეული პრეზიდენტი, ჯო ბაიდენი და არჩეული ვიცე-პრეზიდენტი, კამალა ჰარისი უფლებამოსილებას 20 იანვარს, ინაუგურაციის შემდეგ შეუდგებიან. მანამდე კი ხელისუფლების გადაბარების პროცესი იქნება.

კონგრესში არჩევნების შედეგების განხილვას მშვიდად არ ჩაუვლია და ის კაპიტოლიუმში ტრამპის მხარდამჭერების შეჭრამ დროებით შეაჩერა. როგორც ადგილობრივი ჟურნალისტები ამბობენ, ამომრჩეველთა კოლეგიის ხმების დამტკიცება ჩვეულებრივი საპროცედურო სხდომაა, რომელიც ორიოდე საათს გრძელდება, თუმცა ვაშინგტონში განვითარებულმა მოვლენებმა ყველაფერი შეცვალა.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

• რა ხდება ვაშინგტონში — განახლებადი

რამდენიმესაათიანი არეულობის შემდეგ სენატში სხდომა განახლდა. ბოლო ინფორმაციით, ოთხი ადამიანი გარდაიცვალა. ერთ-ერთ ქალს კაპიტოლიუმში პოლიციამ შეჭრის დროს ესროლა.

არეულობის შედეგად დაშავდა პოლიციის სულ მცირე 14 თანამშრომელი. ორი ჰოსპიტალიზირებულია. ბოლო მონაცემებით, დაკავებულია 52 პირი: 4 ლიცენზიის გარეშე იარაღის ტარებისთვის, 1 აკრძალული იარაღის ტარებისთვის, 47 კი კომენდანტის საათის დარღვევისთვის.

გარდა ამისა, პრეზიდენტ დონალდ ტრამპის ტვიტერის ანგარიში 12 საათით დაიბლოკა. CNN-ის ინფორმაციით, კომპანიაში განაცხადეს, რომ მიზეზი სამომხარებლო წესების დარღვევა და ძალადობის წამახალისებელი ტვიტებია. მათივე თქმით, თუ ტრამპი აღნიშნულ პოსტებს არ წაშლის, ანგარიშს განმეორებით დაბლოკავენ.

წაშლილი პოსტებიდან ერთ-ერთი ტრამპი მხარდამჭერებს, მათ შორის კაპიტოლიუმში შეჭრილებს "განსაკუთრებულს" უწოდებდა და ამბობდა, რომ ისინი უყვარს. მეორეში კი მათ საქციელს ამართლდება და აცხადებდა, რომ ასე იქცევიან ადამიანები, რომლებსაც არჩევნები წაართვეს. ტრამპის ეს განცხადებები ძალადობის წახალისებად შეფასდა.

გაიგეთ მეტი:

• კაპიტოლიუმში ძალადობა და დესტრუქცია ახლავე უნდა შეწყდეს — მაიკ პენსი აშშ-ს მიმართავს
• ტრამპმა ვიდეომიმართვა გაავრცელა: ის ისევ გაყალბებულ არჩევნებზე საუბრობს და მხარდამჭერებს დაშლას ურჩევს
• ბორის ჯონსონი აშშ-ის კონგრესში განვითარებულ მოვლენებს სამარცხვინოს უწოდებს
• დემოკრატიული არჩევნების შედეგებს პატივი უნდა სცენ — სტოლტენბერგი კაპიტოლიუმში შეჭრაზე