Sia კრიტიკის ობიექტი გახდა, მას შემდეგ, რაც საავტორო ფილმში Music აუტისტური სპექტრის მქონე, საუბრის უუნარო გოგოს როლის შესრულება მედი ზიგლერს მიანდო.

შეზღუდული შესაძლებლობების არმქონე ზიგლერის როლზე შერჩევას ხალხი "მიუღებელ" და "გულდასაწყვეტ" ფაქტს უწოდებს. ტვიტერის მომხმარებლების თქმით, ამ გადაწყვეტილებით Sia აუტისტური სპექტრის მქონე ადამიანებს საკუთარი ისტორიების გაზიარების შესაძლებლობას არ აძლევს.

ნოემბერში დაწყებულ სკანდალს მომღერალი ტვიტერზე გამოეხმაურა და აღნიშნა, რომ სპექტრის მქონე, საუბრის უუნარო გოგოსთან თანამშრომლობა სცადა.

"საუბრის უუნარო, სპექტრის მქონე, ლამაზ, ახალგაზრდა გოგოსთან თანამშრომლობა ვცადე, თუმცა მისთვის პროცესი უსიამოვნო და სტრესული აღმოჩნდა. მედი ამიტომ დავასაქმე".

მან სხვა ტვიტიც გამოაქვეყნა, რომლის გამოც კიდევ ერთხელ მოექცა კრიტიკის ქარცეცხლში, რადგან ხალხის აზრით, Sia ნარკოდამოკიდებული ადამიანებისა და სექსმუშაკების შესახებ არასწორ დამოკიდებულებებს აჟღერებდა. კამათის საგანი გახდა მისი გაღიზიანებული ტონიც, რომელსაც აუტისტური სპექტრის მქონე ადამიანების მისამართით იყენებდა, რადგან მომღერალი არ ითვალისწინებდა მათ საფუძვლიან შეშფოთებას.

"ფილმში 13 ნეიროატიპიური, 3 ტრანსგენდერი ადამიანი დავაკავე და არა როგორც მეძავი ან ნარკოდამოკიდებული, არამედ, როგორც ექიმი, ექთანი და მომღერალი. ჯანდაბა, საწყენია, რომ ფილმიც კი არ უნახავთ. ჩემი გულის კარნახი ყოველთვის სწორი იყო".

"რამდენიმე სპექტრის მქონე მსახიობი, მათ შორის მეც, აღნიშნულ ტვიტებს გამოვეხმაურეთ. ყველამ ვთქვით, რომ როლის შესრულება ჩვენც შეგვეძლო. თუმცა ბოდიში ბოდიშად დარჩა და რეალური ძალისხმევა არავის გამოუჩენია, რომ აუტისტური სპექტრის მქონე ადამიანები გადაღების პროცესში ჩაერთო", — დაწერა ერთ-ერთმა ტვიტერის მომხმარებელმა, რასაც Sia შემდეგი სიტყვებით გამოეხმაურა — "იქნებ, უბრალოდ ცუდი მსახიობი ხარ".

თვეების შემდეგ, მომღერალი კიდევ ერთხელ ალაპარაკდა ინციდენტზე და აღნიშნა, რომ ზიგლერის როლზე დამტკიცება აბლეიზმიც (დისკრიმინაცია, რომელიც შეზღუდული შესაძლებლობების არმქონე პირს უპირატესობას ანიჭებს) იყო, მაგრამ უფრო ნეპოტიზმი.

"გავაცნობიერე, რომ ეს აბლეიზმი არ იყო — ანუ, აბლეიზმიც არის, ალბათ, მაგრამ რეალურად ნეპოტიზმია, რადგან მედის გარეშე პროექტის გაკეთება არ შემიძლია და არც მინდა", — განაცხადა მომღერალმა

წყვილმა პირველად 2014 წელს იმუშავა ერთად და მას შემდეგ თანამშრომლობენ.