წინასწარი შედეგებით, სენატის არჩევნებზე დემოკრატი რაფაელ უორნოქი ლიდერობს. გამარჯვების შემთხვევაში ის პირველი შავკანიანი იქნება სენატში, რომელიც ჯორჯიის შტატს წარმოადგენს.

ჯორჯიის შტატი ორ სენატორს ირჩევს. 3 ნოემბრის არჩევნებზე ვერც ერთმა კანდიდატმა ხმების საჭირო, 50 პროცენტზე მეტი ვერ მოიპოვა და სწორედ ამიტომ, განმეორებითი არჩევნები ჩაინიშნა.

რაფაელ უორნოქი 15 წელია პასტორია და იმავე ეკლესიაში ქადაგებდა, სადაც მარტი ლუთერ კინგი მოღვაწეობდა. როგორც წინასწარი შედეგები ცხადყოფს, მან მოქმედი სენატორი, რესპუბლიკელი კელი ლეფლერი დაამარცხა. ხმების 98 პროცენტის დათვლის შემდეგ, უორნოქს 50,6 პროცენტი აქვს მოპოვებული, ხოლო ლეფლერს — 49,4 პროცენტი.

კელი ლეფრელს სენატორის არჩევნებში მონაწილეობა არასდროს მიუღია. ის სენატორის პოსტზე გუბერნატორმა მას შემდეგ დანიშნა, რაც ჯონი აიზეკმა ჯანმრთელობის მდგომარეობის მიზეზით პოსტი დატოვა.

ახლა ყურადღება ჯორჯიის სენატორის მეორე ადგილზეა მიპყრობილი, სადაც ბრძოლა დემოკრატ ჯო ოსოფსა და რესპუბლიკელ დევიდ პერდიუს შორის არის. როგორც AP წერს, ჯერჯერობით ნაადრევია გამარჯვებულის დასახელება, რადგან კანდიდატები თითქმის ერთნაირად მიდიან.

ჯორჯიის შტატის სენატორობისთვის ბრძოლა გადამწყვეტი იქნება არჩეული პრეზიდენტი, ჯო ბაიდენისთვისაც. თუ ორივე ადგილს დემოკრატი კანდიდატი მოიპოვებს, მაშინ პარტიებს შორის ადგილები 50/50-ზე გადანაწილდება და ეს დემოკრატებს უფრო გააძლიერებს, რაც ბაიდენს მოქმედებების არეალს გააფართოებს.