ფრაქცია ქართული ოცნების თავმჯდომარის, მამუკა მდინარაძის განცხადებით, ყველა ის პარტია ვინც მიხვდება, რომ არ უნდა მოექცეს ევროპული საქართველოსა და ნაციონალური მოძრაობის ბულინგის ქვეშ, შევა პარლამენტში.

"თუკი ვინმე, და ამას პირველად არ ვამბობ, რაციონალურად იფიქრებს; იფიქრებს სახელმწიფოებრივად და არა მხოლოდ კონკრეტული პარტიული ინტერესებიდან გამომდინარე; თუკი ვინმე მიხვდება, რომ ორი პარტიის, ე.წ. ევროპული საქართველოსა და ნაციონალური მოძრაობის ბულინგს, მესიჯბოქსს, ნარატივს, მათ მიერ დადგმულ სცენებს არ უნდა დაექვემდებაროს და ამის გავლენის ქვეშ არ უნდა მოხვდეს, ყველა შემოვა საქართველოს პარლამენტში პარლამენტში", — აცხადებს მდინარაძე.

მისი თქმით, გასაკვირია, რომ ადამიანებს, ვისაც ქვეყნის მართვაზე აქვთ პრეტენზია, ეშინიათ ევროპული საქართველოსა და ნაციონალური მოძრაობის.

"გასაკვირია, პირდაპირ გეუბნებით, ხალხს, რომლებსაც ქვეყნის მართვაზე აქვთ პრეტენზია, როდესაც წინასაარჩევნო კამპანიის დროს გამოდიან კონკრეტული მესიჯებით, როგორ შეიძლება ეშინოდეს და როგორ შეიძლება ეს ხალხი ექვემდებარებოდეს, მაგალითად ევროპული საქართველოს თუ ნაციონალური მოძრაობის ბულინგს", — განაცხადა მამუკა მდინარაძემ.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.

ოპოზიციური პარტიები 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებენ. მათ არჩევნებს მეორე ტურში მონაწილეობასა და საპარლამენტო მანდატებზე უარი თქვეს.

ქართულ ოცნებაში აცხადებენ, რომ ბარიერგადალახულ რვა პარტიას შორის, პატარა პარტიები დიდი პარტიების გავლენისა და ბულინგის ქვეშ არიან.

პოლიტიკური კრიზისის განსამუხტად, მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობს. უკვე გაიმართა მოლაპარაკების ოთხი ეტაპი, თუმცა, შეთანხმება კვლავ ვერ შედგა და პარლამენტი ერთპარტიულად აგრძელებს მუშაობას. მოლაპარაკებების მომდევნო ეტაპი, სავარაუდოდ, იანვრის ბოლომდე გაიმართება.

გაიგეთ მეტი: