პრემიერმინისტრის, გიორგი გახარიას თქმით, მთავრობა 2021 წლის განმავლობაში სრულად დაასუბსიდირებს ელექტროენერგიის დღევანდელსა და გაზრდილ ტარიფს შორის სხვაობას. გახარიას ინფორმაციით, შეღავათი შეეხება მათ, ვინც 300 კილოვატამდე ელექტროენერგიას მოიხმარს, რაც, მისივე თქმით, აბონენტთა 95%-ია.

"2021 წლის განმავლობაში საქართველოს მოქალაქეები ელექტროენერგიაზე ტარიფის გაძვირებას არ იგრძნობენ. ეს ნიშნავს იმას, რომ საქართველოს მთავრობა, სხვაობას დღევანდელ ტარიფსა და გაზრდილ ტარიფს შორის, რომელსაც დღეს დაადგენს კომისია, სრულად დაასუბსიდირებს 300 კილოვატამდე მოხმარების აბონენტებისთვის [...]

საქართველოში არის სულ 1 700 000 აბონენტი, აქედან 1 600 00 მოიხმარს 300 კილოვატზე ნაკლებს. რაც ნიშნავს იმას, რომ 95% სრულად იქნება ნაზარდი ფასი ელექტროენერგიაზე სუბსიდირებული", — განაცხადა გიორგი გახარიამ.

პრემიერმინისტრის ინფორმაციით, მომდევნო წლის განმავლობაში, სახელმწიფო ასევე აანაზღაურებს იმ კომპანიების ელექტროენერგიის გადასახადის 50%-ს, ვინც საკვებ პროდუქტებს აწარმოებს.

"ყველა იმ კომპანიას, რომელიც არის პირველად დასაქმებაში, საკვები პროდუქტების წარმოების, ადგილობრივ წარმოებაზეა აქ საუბარი, სრულად ექნება დასუბსიდირებული ნაზარდი ტარიფი დღევანდელ ტარიფსა და გაზრდილ ტარიფს შორის, 50%-ის, 2021 წლის განმავლობაში", — განაცხადა გიორგი გახარიამ.

გიორგი გახარია ვარაუდობს, რომ გაიზრდება წყალმომარაგების ტარიფიც. მისი თქმით, სახელმწიფო სრულად დაასუბსიდირებს წყლის ტარიფის ზრდის სხვაობას სოციალურად დაუცველებისთვის.

შპს თბილისი ენერჯი 2021 წლის 3 იანვრიდან კომერციული მომხმარებლებისთვის, პურის საწარმოების გარდა, გაზის ტარიფს აძვირებს. კომპანიაში აცხადებენ, რომ არასაყოფაცხოვრებო აბონენტებისთვის ბუნებრივი აირის ფასი ერთ კუბურ მეტრზე 1 ლარითა და 10 თეთრით განისაზღვრება, დამატებული ღირებულების გადასახადის ჩათვლით.

კომპანიაში, აღნიშნავენ, რომ ბუნებრივი აირის ფასი საყოფაცხოვრებო მომხმარებლებისთვის არ ძვირდება, რომელიც 1 კუბურ მეტრზე 0,461374 ლარს შეადგენს და დადგენილია სემეკის მიერ.

გაიგეთ მეტი: