ეკონომიკის მინისტრი, ნათია თურნავა აცხადებს, რომ დენის ტარიფზე გადაწყვეტილებას დამოუკიდებელი რეგულატორი, სემეკი იღებს და მათ კომპეტენციაში ჩარევას არ აპირებენ. ხვალ, 29 დეკემბერს სემეკმა ელექტროენერგიაზე ახალი ტარიფი უნდა დაადგინოს.

"ჩვენ დარწმუნებულები ვართ, რომ სემეკი მიიღებს დაბალანსებულ, ოპტიმალურ გადაწყვეტილებას, რომელიც, ერთი მხრივ, მომხმარებლის უფლებებს დაიცავს, მეორეს მხრივ, ენერგოკომპანიებსაც მისცემს საშუალებას უსაფრთხოდ მიაწოდონ ელექტროენერგია მოსახლეობას და კომერციულ აბონენტებს. ამ ეტაპზე, ჩვენ არ ჩავერევით მათ კომპეტენციაში", — აცხადებს თურნავა.

კომპანია ენერგო-პრო ჯორჯიაში აცხადებენ, რომ ელექტროენერგიის ტარიფის მნიშვნელოვანი ზრდა გარდაუვალია და რომ სამომხმარებლო ტარიფის ზრდა აუცილებელია. როგორც კომპანიაში განმარტავენ, მოქმედი ტარიფი დიდი ხანია ვერ ანაზღაურებს გაზრდილ ხარჯებს ელექტროენერგიის შესყიდვის თუ სხვა მიმართულებებით.