ცენტრალური აფრიკის რესპუბლიკაში გაეროს სამშვიდობო ძალების სამი წევრი მოკლეს. ამის შესახებ ინფორმაციას Aljazeera ავრცელებს.

მედიის ცნობით, მშვიდობისმყოფელი ბურუნდიდან იყვნენ. გარდა ამისა, დაჭრილია 2 ადამიანი. სხვა დეტალები თავდასხმასთან დაკავშირებით არ ვრცელდება. დაძაბულობა აფრიკის რესპუბლიკაში რამდენიმე კვირაა გრძელდება და მოახლოებულ საპრეზიდენტო და საპარლამენტო არჩევნებს უკავშირდება.

საკონსტიტუციო სასამართლომ მიიღო გადაწყვეტილება, რომ არჩევნები ქვეყანაში დაგეგმილის შესაბამისად, 27 დეკემბერს გაიმართება. სწორედ არჩევნების გადადებას ითხოვდა სხვადასხვა ოპოზიციური ჯგუფი და ასევე, ახლადშექმნილი შეიარაღებული დაჯგუფება — პატრიოტთა კოალიცია ცვლილებებისთვის. ისინი მთავრობას არჩევნების გაყალბების მცდელობაში ადანაშაულებენ.