საპარლამენტო უმრავლესობის ლიდერის, ირაკლი კობახიძის თქმით, სახლების დემონტაჟთან დაკავშირებით სახელმწიფოს მხრიდან რეაგირება უნდა იყოს და არ უნდა მოხდეს სახელმწიფოს პასიურობის ბოროტად გამოყენება.

"სახელმწიფო რაღაც ეტაპზე იყო პასიური, რაც არ არის სწორი. ამ შემთხვევაში იყო საჭირო კანონის აღსრულება. კანონის აღსრულება დაიწყო და გრძელდება. რაც შეეხება ახალ წელთან დაკავშირებას, როგორც მოგეხსენებათ სახლები არის ცარიელი, აქედან გამომდინარე მათ დემონტაჟს არა აქვს კავშირი ახალ წელთან. გახსოვთ, ბათუმში, როდესაც პასიური იყო სახელმწიფო, უზარმაზარი პრობლემა გაჩნდა და პრაქტიკულად ცალკე ქალაქი წარმოიქმნა იქ. თუ სახელმწიფოს მხრიდან რეაგირება არ იქნება მყისიერი და კანონის მხრიდან იქნება უპატივცემულობა, სახელმწიფო თავის სახეს დაკარგავს. ჩვენი მიზანია სახელმწიფოს სახის შენარჩუნება", — ამბობს კობახიძე.

15 დეკემბერს იგივე ქმედებებს აფრიკის დასახლებაში ხმაური მოჰყვა. ტერიტორიაზე სპეციალური ტექნიკის შეყვანას მოსახლეობამ გააპროტესტა. ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი, რომელთა ნაწილი უკვე გათავისუფლდა.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს. პასუხად ადგილობრივები ამბობენ, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

გაიგეთ მეტი: