საქართველოს განათლების მინისტრობის კანდიდატის, მიხეილ ჩხენკელიის მტკიცებით, პანდემიის მიუხედავად, განათლების უწყვეტობისა და ხარისხის უზრუნველყოფა მაინც მოხერხდა. მისი განცხადებით, სამინისტრომ სკოლებისთვის "დროულად" შეიმუშავა შესაბამისი რეკომენდაციები და "წარმატებით" დანერგა დისტანციური სწავლების სხვადასხვა სისტემა.

"საქართველოს მიერ განათლების მიმართულებით განხორციელებულ ანტიკრიზისულ ღონისძიებებს მაღალ შეფასებებს აძლევენ და ერთ-ერთ საუკეთესო მაგალიტად ასახელებენ. კერძოდ, Microsoft-ის განათლების მიმართულების ვიცე პრეზიდენტმა მაღალი შეფასება მისცა სამინისტროს მიერ დისტანციური სწავლების ხელშეწყობის მიზნით გატარებულ ღონისძიებებს და რეკომენდაცია გაუწია სხვა ქვეყნების წარმომადგენლებს უფრო მეტი გაეგოთ საქართველოს მიდგომების შესახებ. მაღალი შეფასება მისცა გაეროს ბავშვთა ფონდის წარმომადგენლის ხელმძღვანელმა საქართველოში", — განაცხადა ჩხენკელმა.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.