ნარიყალას ტურისტულ ბილიკიდან მერიის ზედამხედველობის სამსახურის მითითებით, გარემოვაჭრეებმა თავიანთი ჯიხურებისა და სხვა სავაჭრო ინვენტარის ალაგება დაიწყეს. ადგილზე დარჩენილი ერთ-ერთი გარემოვაჭრის თქმით, მერიის წარმომადგენელი გუშინ, 18 მაისს მივიდა მათთან და მოსთხოვა, რომ ყველაფერი აელაგებინათ და ვაჭრობა შეეწყვიტათ:

"გვითხრეს, რომ აქ რაც არის განლაგებული, ჯიხურები, მაცივრები, ყველაფერი წაგვეღო".

მისივე თქმით, ნარიყალას ტერიტორიაზე მომრავლებულმა სავაჭრო ობიექტებმა განაპირობა ის, რომ მერიის სამსახურმა საბოლოოდ ყველას აუკრძალა იქ მუშაობა.

ფოტო: გვანცა ნემსაძე / On.ge

გარემოვაჭრეების თქმით, მერიის წარმომადგენელმა მათ განუმარტა, რომ მათი ინვენტარი იერსახეს ამახინჯებდა:

"ქალაქს ამახინჯებსო და მართლაც ასეა, ვეთანხმებით, მაგრამ ველოდებით რომ უკეთესი ჯიხურებს დაგვიდგან. გვითხრეს, ათ დღეში დაგიდგამთ სხვა ჯიხურებს და თქვენს ნივთებს იქ შეიტანთო, თუმცა ჩვენ ამ ათი დღის არ გვჯერა".

თბილისის ზედამხედველობის სამსახურში On.ge-ს განუცხადეს, რომ გარემოვაჭრეებს 20 მაისამდე მისცეს ვადა ტერიტორიიდან ნივთების გასატანად.

"ალაგებულია ყველაფერი და ხვალისთვის დასრულდება, რადგან აკრძალულია გარევაჭრობა".

ზედამხედველობის სამსახურში ასევე განაცხადეს, რომ მათი წარმომადგენლობის მხრიდან არანაირი დაპირება არ გაცემულა ახალი ჯიხურების დადგმასთან დაკავშირებით.

"ასეთ დანაპირებს ვერ გავცემდით, რადგან რეალურად ზედამხედველობას მაგის ბერკეტი და უფლება არ გააჩნია".

მისივე თქმით, მათ სამსახურში გარევაჭრობის ფაქტის შესახებ განცხადება შევიდა და ამის საფუძველზე მიიღეს ზომები.

ფოტო: ირაკლი მეძმარიაშვილი

ფოტო: ირაკლი მეძმარიაშვილი

17 მაისს, ირაკლი მეძმარიაშვილმა სოციალურ ქსელში მის მიერ ნარიყალას ბილიკზე და ქართლის დედის მიმდებარე ტერიტორიაზე გადაღებული ფოტოები გამოაქვეყნა, სადაც ჩანდა რომ ტურისტული ბილიკის გასწვრივ ათეულობით რკინის სავაჭრო ჯიხური იყო დადგმული.