პატრიარქის მოსაყდრე შიო ქადაგებისას მრევლს უმტკიცებდა, რომ განსაცდელებს, მათ შორის პანდემიას, ღმერთი ხალხს ჭკუის სასწავლებლად უგზავნის, რომ მოინანიონ და მასთან დაბრუნდნენ. მისი აზრით, პანდემიის მიზეზი შესაძლოა, იყოს "არასწორი ცხოვრება და ცოდვები".

"უფალმა ინებოს, რომ დავძლიოთ ის მძიმე განსაცდელი, რომელიც გვაქვს პანდემიის სახით მთელ ერს და მსოფლიოს და წმინდა ნოკოლოზი, როგორც მსწრაფლშემწე შეგვეწიოს. დავძლიოთ არამარტო ეს სენი, არამედ გამომწვევი მიზეზებიც დავძლიოთ.

ჩვენ ხომ უნდა ვიფიქროთ, რა არის მიზეზი ამა თუ იმ განსაცდელის, რომ ხშირად ეს არის ჩვენი არასწორი ცხოვრება, ჩვენი ცოდვები, ჩვენი დაშორება ღმერთთან. განსაცდელების მეშვეობით უფალი გვასწავლის, როგორც თავის შვილებს მამა ასწავლის, რომ გამოსწორდნენ, მოინანიონ, შეინანიონ და დაბრუნდნენ უფლის წიაღში", — განაცხადა მან ქადაგებისას.

კორონავირუსის ეპიდემია პანდემიად სწორედ იმიტომ გამოცხადდა, რომ ის მსოფლიოს თითქმის ყველა ქვეყანაში გავრცელდა. ეს პირველი შემთხვევა არ არის, როდესაც სასულიერო პირები ვირუსს უფლის განსაცდელად წარმოაჩენენ.