"მშვიდობიანი რევოლუცია ნიშნავს იმას, რომ სამოქალაქო პროტესტის შედეგად ხელისუფლება იძულებულია გადადგეს და ინიშნება ვადამდელი არჩევნები — ეს არის დემოკრატიის ერთ-ერთი შემადგენელი ნაწილი და ფუნდამენტიც კი", — ასე განმარტავს ნაციონალური მოძრაობის ლიდერი, ნიკა მელია თავის სიტყვებს რევოლუციის შესახებ, რომელსაც კრიტიკა მოყვა.

გუშინ, 18 დეკემბერს, მელიამ განაცხადა, რომ ხელახალი არჩევნები არის უცვლელი მოთხოვნა და ეს არ გადაიხედება და პროტესტი გადაიზრდება უკმაყოფილებაში, "ტრანსფორმირდება შეიძლება, მათ შორის, მშვიდობიან რევოლუციაში".

მისივე თქმით, საპროტესტო აქციებისთვის მზადების პროცესი დაიწყება, თუ მათი მოთხოვნა არ შესრულდება.

ევროპული საქართველოს ლიდერმა, გიგა ბოკერიამ კი განაცხადა, რომ ხელისუფლებამ რევოლუციური გზით მოქმედების არჩევანი დაუტოვათ, რაც არ სურთ. მისი თქმით, შექმნილი პოლიტიკური კრიზისიდან ერთადერთი სწორი გზა — ვადამდელი, ნორმალური არჩევნებია

იუსტიციის ყოფილი მინისტრი და პარლამენტის წევრი, თეა წულუკიანი კი ამბობს, რომ ვერავითარი რევოლუცია ამ ქვეყანაში ვერ იქნება. წულუკიანის თქმით, პოლიტიკურ ძალებს არეულობისა და დესტაბილიზაციის საშუალებას არავინ მისცემს.