შინაგან საქმეთა მინისტრის მოვალეობის შემსრულებლის, ვახტანგ გომელაურის განცხადებით, მედიაში მცირე ინციდენტებიც კი ინტენსიურად შუქდება, რაც მისი აზრით, ქმნის განცდას, რომ დანაშაულმა იმატა. ამის შესახებ მან სამინისტროს 2020 წლის ანგარიშის წარდგენაზე ისაუბრა.

"ჩვენ პატივს ვცემთ სიტყვის და გამოხატვის თავისუფლებას. სწორედ ჩვენი ხელისუფლების ძალისხმევის შედეგია, რომ მედია თავისუფალია. ერთი კაბინეტიდან არ კონტროლდება და ნებისმიერი ინფორმაცია ყველასათვის ხელმისაწვდომია", — თქვა გომელაურმა.

მინისტრის თქმითვე, ოპონენტების განცხადებები კრიმინალის ზრდასთან დაკავშირებით, პოლიციის დისკრედიტაციისკენაა მიმართული, რადგან წინა წელთან შედარებით, დანაშაულის სტატისტიკა 10%-ით შემცირდა. თუმცა 24%-ით მოიმატა კიბერდანაშაულმა, 8,5%-ით ოჯახში ძალადობამ და მკვლელობამ 11%-ით. რაც შეეხება კლებას, 42%-ით შემცირება აღინიშნება ყაჩაღობაში, 34%-ით გამოძალვაში, 25% ძარცვაში. ამასთან, 12%-ით იკლო ქურდობამ, 28%-ით კი ბინების ქურდობამ.