ქართული ოცნების ერთ-ერთი ლიდერი, ირაკლი კობახიძე ფიქრობს, რომ კანონპროექტი, რომელიც ბოიკოტში მყოფ ოპოზიციას დაფინანსებას შეუწყვეტს, ოპოზიციის "წამახალისებელი" მექანიზმია. თავად ოპიზიცია ამ იდეებს რუსეთისა და ბელარუსის დიქტატორულ რეჟიმებს ადარებს.

"ყველა პოლიტიკური პარტია, რომელიც უარს ამბობს მანდატზე უშვებს სერიოზულ შეცდომას, კანონპროექტების ეს პაკეტი იქნება დამატებითი წამახალისებელი მექანიზმი, რომელიც ხელს შეუწყობს მათ მიერ სწორი გადაწყვეტილების მიღებას", — ამბობს კობახიძე რუსთავი 2-ზე დღის კურიერის ეთერში.

კობახიძის განცხადებით, 17 დეკემბერს პარლამენტში ინიციატივის წესით შევიდა კანონპროექტების პაკეტი, რომელიც საპარლამენტო საბოტაჟის წინააღმდეგ არის მიმართული. კობახიძის თქმით, აღნიშნული პაკეტი სახელმწიფო დაფინანსების შეწყვეტასა და შეჩერებას ითვალისწინებს იმ პოლიტიკური პარტიებისთვის, რომლებიც საპარლამენტო მანდატებს სრულად არ ითვისებენ ან რომელთა წარდგენით არჩეული დეპუტატები პარლამენტის პლენარულ სხდომებს არასაპატიო მიზეზით აცდენენ.

საარჩევნო კოდექსში შესატანი ცვლილების თანახმად, იგივე პარტიები მუნიციპალური და საპარლამენტო არჩევნებისთვის განკუთვნილი უფასო საეთერო დროით ვერ ისარგებლებენ.