საქართველოს საგარეო საქმეთა სამინისტროს ცნობით, პანდემიით გამოწვეული შეზღუდვების გათვალისწინებით, საქართველოში მყოფ უცხო ქვეყნის მოქალაქეებს ქვეყანაში ლეგალური ყოფნის ვადა 1-ელ ივლისამდე გაუხანგრძლივდათ.

უწყების ცნობით, ახალი გადაწყვეტილებით, პირები, რომლებიც 2020 წლის 14 მარტისთვის ლეგალურად იმყოფებოდნენ საქართველოს ტერიტორიაზე და პანდემიით გამოწვეული შეზღუდვების გამო, კანონიერად ყოფნის ვადის ამოწურვამდე, ვერ შეძლეს ქვეყნის დატოვება, უფლებამოსილნი არიან, იმყოფებოდნენ საქართველოს ტერიტორიაზე 2021 წლის 1-ელ ივლისამდე.

ამასთან, სამინისტროს განცხადებით, მათი საქართველოს ტერიტორიაზე ყოფნა გამოწვეული უნდა იყოს პანდემიასთან დაკავშირებული შემდეგი გარემოებებით:

  • თუ პირის მოქალაქეობის სახელმწიფო შესაბამისი პერიოდისათვის შედიოდა მაღალი რისკის ზონაში;
  • თუ საზღვრის კვეთაზე შეზღუდვა დაწესებულია შესაბამისი სახელმწიფოს მიერ;
  • თუ პირი ჯანმრთელობის მდგომარეობის გამო იმყოფება საავადმყოფოში, კარანტინში ან თვითიზოლაციაში;
  • თუ პირმა ვერ დატოვა ქვეყანა დადგენილ ვადაში გაუქმებული ავიარეისების გამო.

"საკორდინაციო საბჭოს გადაწყვეტილებით 1-ელი იანვრიდან 1-ელ ივლისამდე პერიოდში უცხო ქვეყნის მოქალაქეებისთვის ზემოთ ჩამოთვლილი გარემოებებიდან გამომდინარე საქართველოს ტერიტორიაზე ყოფნა ჩაითვლება კანონიერად საქართველოში ბინადრობის ნებართვის მოპოვების მიზნებისათვისაც, შესაბამისი კრიტერიუმების დაკმაყოფილების შემთხვევაში", — ვკითხულობთ განცხადებაში.

აღნიშნულ ცვლილებამდე, საქართველოში მყოფ უცხო ქვეყნის მოქალაქეებს ლეგალური ყოფნის ვადა მიმდინარე წლის 31 დეკემბრამდე ჰქონდათ განსაზღვრული.