ქართული ოცნების აღმასრულებელი მდივანი, ირაკლი კობახიძე ამბობს, რომ მმართველი პარტიის ამოცანა ე.წ. რადიკალური ოპოზიციის დაშლა იყო და ამაში ოპოზიციონერი ლიდერები, როგორც თვითონ უწოდებს მათ, ოდიოზური ფიგურები ეხმარებიან. ასე გამოეხმაურა კობახიძე ერთიანი ნაციონალურ მოძრაობის უკვე ყოფილი თავმჯდომარის, გრიგოლ ვაშაძის მიერ საკუთარი პარტიის დატოვებას.

"ძალიან კარგად და სწორი მიმართულებით ვითარდება პოლიტიკური პროცესები. ჩვენი ამოცანა იყო ამ რადიკალური ოპოზიციის შიგნით კორექტივებს შეტანა და ძალიან გვეხმარებიან ამაში სწორედ ის ოდიოზური ფიგურები, რომლებიც შლიან დღეს ოპოზიციას", — ამბობს კობახიძე.

ის ასახელებს კონკრეტულ პირებს, ვინც, მისივე თქმით, ხელს უწყობენ ოპოზიციური პარტიების დაშლას.

"ეს ოდიოზური ფიგურები, როგორიც არიან, პირველ რიგში, სააკაშვილი, გვარამია, ბოკერია, შეიძლება მერაბიშვილზეც და სხვებზეც, ბუნებრივია, ლაპარაკი. ისინი შლიან დღეს ნაციონალურ მოძრაობას და ევროპულ საქართველოს.

ბოკერიამ დაანგრია საკუთარი პარტია და ცდილობს რომ საფლავში ჩაიყოლოს ასევე სხვა პოლიტიკური პარტიები. ანალოგიურად, ნაციონალური მოძრაობის ოდიოზურმა ლიდერებმა, სააკაშვილმა და გვარამიამ, დაშალეს ნაციონალური მოძრაობა. რაც ძალიან კარგი პროცესია. ეს არის ჯანსაღი პროცესი და ამ ყველაფრის შედეგად ჩვენ მივიღებთ უკვე ჯანსაღ ოპოზიციურ სპექტრს", — განაცხადა ირაკლი კობახიძემ.

დღეს, 15 დეკემბერს, გრიგოლ ვაშაძემ საკუთარ ფეისბუქ გვერდზე დაწერა, რომ ტოვებს ნაციონალურ მოძრაობას.

გაიგეთ მეტი: