ქართული ოცნების დეპუტატი, ელისო ბოლქვაძე ამბობს, რომ ის 20 ივნისის აქციებსა და გავრილოვის ღამეს პარიზიდან უყურებდა და ხედავდა "ძალიან დიდ ღელვასა და ჯიკაობას". მან ამის შესახებ, მე-10 მოწვევის პარლამენტის პირველი სხდომის დასრულების შემდეგ, მთავარ არხს განუცხადა.

ჟურნალისტსა და ელისო ბოლქვაძეს შორის დიალოგი ასე წარიმართა:

ბოლქვაძე: საკანონმდებლო ორგანოს წინ ასეთი რამ არ....

ჟურნალისტი: საფრანგეთში ჯიკაობა არ გინახავთ?

ბოლქვაძე: რა თქმა უნდა, მინახავს ოღონდ ქუჩაში, ქუჩაში გამოსვლების მეტი რა მინახავს.

ჟურნალისტი: და დათხრილი თვალები გინახავთ?

ბოლქვაძე: ახალგაზრდობა დაინტერესებული უნდა იყოს თავისი წინსვლით და უნდა იჯდეს იმეცადინოს, წარმატებებს მიაღწიოს.

ჟურნალისტი: და არ უნდა გააპროტესტონ რაც არ მოსწონთ?

ბოლქვაძე: მე დღეს გავრილოვის თემას არ ვეხები და არ ვიხილავ ამ თემას.

პიანისტი, ელისო ბოლქვაძე ქართული ოცნების პარტიულ სიაში 32-ე ნომრად იყო წარდგენილი და ამ მოწვევის პარლამენტის დეპუტატი გახდა.

20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეები და ოპოზიციის წევრები ითხოვდნენ პარლამენტის თავმჯდომარის, სუს-ის ხელმძღვანელის და შს მინისტრის გადადგომას.

მშვიდობიანი პროტესტი მოგვიანებით დაპირისპირებაში გადაიზარდა და ცენტრალურ გამზირზე მობილიზებულმა სპეცრაზმმა აქციის დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. საგამოძიებო უწყებამ დაზარალებულად 67 სამართალდამცავი და 4 მოქალაქე ცნო. ამავე საქმეზე ბრალი წაუყენეს 3 სამართალდამცავსა და 17 მოქალაქეს.