საქართველოს ექსპრეზიდენტის, გიორგი მარგველაშვილის განცხადებით, ერთპარტიული პარლამენტის შეკრება არის მძიმე დღე, რომელიც არასასიამოვნო ლაქად შევა საქართველოს ისტორიაში.

"ალბათ, ძალიან ბევრი ადამიანისთვის წარმოუდგენელი იყო მაშინ, როდესაც საბჭოთა კავშირის წინააღმდეგ გამოვდიოდით და დამოუკიდებელი, თავისუფალი საქართველოსთვის ვიბრძოდით, რომ ესეთი რამე შეიძლება მომხდარიყო 30 წლის თავზე და საქართველოში შემდგარიყო ერთპარტიული პარლამენტი. სიმძიმე ამ დღის, სიმძიმე ამ დაცემის, რომელიც დღეს ხდება ჩვენი სახელწმიფოებრიობისთვის, დემოკრატიისთვის, პერსპექტივისთვის მე ვფიქრობ, ძალიან მძიმე და ბოლომდე გასააზრებელია.

წარმოუდგენელია, რომ თავისუფლების მოყვარე ერისთვის, რომელსაც მრავალხმიანობა და მრავალჟამიერი თავისი იდენტობის ფუნდამენტად გაუხდია, დამოუკიდებლობის 30 წლისთავზე გაებედა ვინმეს, რომ ერთპარტიული პარლამენტი შედგებოდა. მე არ მეგონა, რომ ამას ჩვენ გავუბედავდით საკუთარ თავს, საკუთარ ისტორიას და რომელიღაცა პოლიტიკური ძალა საქართველოს აკადრებდა ერთპარტიულ მმართველობას", — განაცხადა მარგველაშვილმა TV პირველის ეთერში.

დღეს, 11 დეკემბერს პარლამენტში მე-10 მოწვევის სხდომა მიმდინარეობს, რომელშიც მხოლოდ ქართული ოცნება იღებს მონაწილეობას. სხდომაზე ასევე არიან მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ.