ქართული ოცნების დეპუტატის, ბექა ოდიშარიას თქმით, ღირსეული იქნება თუ ოპოზიციის ნაწილი მაინც შევა პარლამემტში. ამის შესახებ მან დღეს მე-10 მოწვევის პარლამენტის პირველი სხდომის დაწყებამდე განაცხადა.

"ძალიან ღირსეული იქნება თუ ოპოზიციის ნაწილი მაინც შემობრძანდება, მე ვიმედოვნებ და მოვუწოდებ მათ გულწრფელად, თავიანთი ადგილები აქ ელოდებათ, მინიჭებული მანდატების გამოყენების უფლება დღესაც აქვთ და მათ წინ არავინ არ ეღობებათ", — აღნიშნა ოდიშარიამ.

დღე მეათე მოწვევის პარლამენტმა ოფიციალურად დაიწყო მუშაობა. უკვე რამდენიმე კვირაა, მმართველ პარტიასა და ოპოზიციას შორის მოლაპარაკებები მიმდინარეობს. მართალია, მხარეები დეტალებს არ ასაჯაროებენ, თუმცა ამბობენ, რომ გარკვეულ პუნქტებზე აზრების დაახლოება მოხერხდა. მიუხედავად ამისა, ოპოზიციისთვის "პრინციპული საკითხები", როგორიცაა რიგგარეშე არჩევნები და პოლიტპატიმრების გათავისუფლება, ქართული ოცნებისთვის კვლავ წითელ ხაზად რჩება.