პარტია მოქალაქეების ლიდერის, ალეკო ელისაშვილის თქმით, სადეპუტატო მანდატის გაუქმებასთან დაკავშირებით განცხადებას ხელს არ მოაწერს. ამის შესახებ მან მთავარი არხის ეთერში განაცხადა. ამავე დროს, იგი ამბობს, რომ 11 დეკემბერს პარლამენტში არ შევა.

მთავარი აქცენტების წამყვანმა, ნიკა გვარამიამ ჰკითხა, დატოვებდა თუ არა ის საპარლამენტო სიას ღიად. 31 ოქტომბრის არჩევნების შედეგებით, რომელსაც არც ელისაშვილი და ოპოზიციის სხვა ლიდერები არ აღიარებენ, პარტია მოქალაქეებმა ორი მანდატი მიიღეს

ნიკა გვარამია: ალეკო ელისაშვილი თავის სიას ღიას ტოვებს?

ალეკო ელისაშვილი: სიას ტოვებს ღიად, რა არის, სიმართლე გითხრა...

გვარამია: აი, ხელს არ აწერს, გამიუქმეთ მანდატი, როგორც სხვები აპირებენ.

ელისაშვილი: არა.

როგორც გადაცემა მთავარ აქცენტებში ელისაშვილმა თქვა, ის პარლამენტში იმ შემთხვევაში შევა, თუ ქართული ოცნება ოპოზიციის მიერ წამოყენებულ ყველა მოთხოვნას დააკმაყოფილებს, რომელიც მათ შორის ეხება რიგგარეშე არჩევნებს, პოლიტპატიმრების გათავისუფლებასა და საარჩევნო რეფორმას.

11 დეკემბერს მეათე მოწვევის პარლამენტის პირველი სხდომის პარალელურად ბარიერგადალახული ოპოზიციური პარტიები, პატრიოტთა ალიანსის გამოკლებით, გეგმავენ ხელი მოაწერონ მემორანდუმს, რომლითაც მანდატებზე უარს იტყვიან.

ორი დღით ადრე პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

ამავე თემაზე: